黎咗加拿大，自己搵工唔係好搵到，不過估唔到反而有headhunt喺LinkedIn度搵到我個profile，問我有無興趣去試一個role。
我拿拿臨向headhunt表示我有興趣，headhunt亦好快同我安排咗一個Zoom call同HR第一次面試。
見工當日，我搵返籠底果件恤衫，暗自慶幸宜家網上見工唔駛搵返我果條唔多啱著既西褲。正喺度緊張緊自己個髮型、衣著同background之際，對面HR join咗zoom call，將我既緊張一掃而空：一個中年女士著住件風褸，背後客廳一覧無遺。好informal囉。
HR：「你好！我地呢個role都搵咗好耐，啱啱早兩日先搵到你個profile覺得好啱，所以好高興今日同你catchup一下。」
我：「多謝你搵我catchup，我其實啱啱先由香港移咗民過黎，所以都係轉咗個profile無耐，好幸運你地會搵我。」
HR：「唔怪之得啦！我地真係睇咗好耐都搵唔到人，如果之前見到你個profile一定搵咗你了，所以先奇怪點會宜家先見到。咁你點解黎加拿大既？黎到習慣嗎？」
講真，淨係呢條問題都可以講4個鐘，所以都係寒暄兩句入正題算。HR既問題其實都好正路，都係叫我介紹一下自己之類。我大約知道佢地呢個role喺要湊邊一個行業既客人，咁啱以前都有相關經驗，所以都特別提下，希望可以加下分。
HR無問以前我喺香港成日遇到既：「你覺得自己強項係咩呀？」「你覺得公司做乜要請你呀」。問既野都係好實在圍繞我既工作經驗，特別係project既內容同做野既approach。
不過，都有一條例外：「五年後你覺得自己會做咩？」
我唔係話呢條問題好出乎意料，事實上以前都有人問過我。
不過問既唔係HR，係我老婆。
講真，我連下星期五食乜都未知，點知5年後會點呢。最好5年後我唔駛撈啦。當然，經歷咗阿囡咁多個面試，學識咗一個道理：「面試時，有時不能講心果句」。於是唯有硬著頭皮講啲門面野應酬佢。
我：「我其實啱啱初到貴境，好多野都唔明白。雖然我喺個行業做咗好耐了，不過我諗北美同亞洲大可能有好多野都唔一樣。所以我諗頭兩年我會盡量了解北美既情況，無論係消費者既習慣定係公司既文化，希望可以係工作上盡量融入到呢個巿場。其餘既事我無諗得太多，順其自然吧。」
講完先發覺，呢一堆門面野，其實係心底說話。
HR：「當然當然。不過我相信你可以適應到既。你喺亞洲既時候同過好多international既公司合作；喺呢度其實反而好少人會有咁既經驗，同本地中小企既會多啲。所以我相信你既經驗係呢度會好有幫助。」
或者佢都係講啲門面說話俾我聽，不過對於我黎講算係一支強心針了。黎加拿大之前成日見啲人話移民要「由零開始」，好似睇武功小說啲大俠忽然武功盡失咁。知道自己都有一啲呢度既人無而又有用既特質，又覺得其實我地香港人作為新移民，未必要妄自菲薄，覺得真係會一移民就變成「二等」啫。
講下講下終於到咗面試尾聲，問咗HR幾個簡單問題同之後既next steps就完結了。總括黎講，覺得呢度既HR問既野又唔係真係同香港好唔同，不過相對上比較實事求事，感覺好似佢有個checklist去check我到底有無符合佢個list既條件咁。
過咗兩日，收到HR通知，成功進入第2輪既面試 – 會見hiring manager同埋另一個director。
昔日同阿囡喺香港小學面試既緊張刺激同患得患失，開始慢慢湧返出黎。
（待續）