喺Bronze carpet度幾經辛苦爬返起身，我滿頭大汗地走過去Silver carpet join返教練同弟弟。
Silver carpet既入口有一度閘，閘既兩邊係兩道高過人既感應器，外圍由一個橙色既鐵架支撐，喺一片白茫茫既雪地中份外醒目。教練之前俾咗一張access card我，只要經過兩道感應器，感應器sense到張咭就會自動打開道閘俾我搭carpet上去坡頂。
我論論盡盡行到閘前，兩邊既感應器好似當我透明一樣唔肯放行。在旁既工作人員用熟練既口吻問：「你係咪放咗張咭同部手機一齊？試下分開佢地袋。」
我喺褸袋掏出我部電話，感應器發出好似八通達「嘟」既一聲，閘門終於打開。
我一邊踏上carpet，一邊慢條斯理地將我部電話放返入我褲袋。忽然有一道力用力將我拉後，然後我成個人坐咗喺張carpet上面。
果道力，叫做地心吸力。
原來因為silver carpet比較斜，而且咁啱又有啲滑。我掛住執野無留意將個重心傾前，所以carpet向上行我重心向後，結果成個人坐咗落地。
工作人員即刻停咗個carpet（唔知定係自動停），然後同教練兩個人「逗」住我「格肋底」將我扶起。我覺得好瘀，因為跌得都幾肉酸，不過好彩無人識我。
上到坡頂，感覺比bronze carpet好似高咗一倍。
教練：「好了，你第一次落，記得pizza要大啲、落得慢啲。因為呢度斜過Bronze。」
我起初將兩腳既八字放到好闊，但個人好似揸車踩住個brake咁幾乎法無移動。我於是將兩隻腳稍為收窄，開始感覺到自己慢慢向前加速；衝咗幾秒我覺得太快，又拉闊雙腳做返大少少既pizza，速度又相應慢返落黎。
我忽然覺得喺Silver Carpet度滑雪，好似反而易過喺Bronze，至少感覺自己滑得流暢啲、速度控制得好啲。
我回頭眼望下弟弟，原來教練已經教緊佢大幅度地zig zag扭過啲雪糕筒。我發覺當我有少少進步既同時，似乎我同弟弟既差距亦進一步擴大。
第二次再滑，教練叫我隨意落，唔好太快就ok。我試下左右腳施唔同力度轉彎，今次竟然可以稍稍控制到自己轉向一邊，又可以將重心放另一邊轉向。就算唔係轉得好靚，但頭先係bronze carpet做唔到既野，宜家竟然都做到。
教練見我好似越做越好，同我講：「我覺得你可以繼續自己練習，我去睇下你個仔再教佢少少野。」
我挽回返少少信心。其實如果可以控制到方向，我基本上都算係學到滑雪呀。接下來只要自己去練習多啲就好了。
我滿心歡喜走去搭carpet，喜孜孜地又開始由坡頂滑落。我開始滑行，一開頭滑得幾順，心諗不如又再試下轉彎，今次比上次再轉多少少。
大家睇到呢度，又如果你有睇過我上一篇，有無覺得…有少少似曾相識？
我同之前一樣失控向carpet方向衝去，於是我又黎pizza想煞停。不過因為呢度比之前喺bronze carpet更斜、我衝得更急，煞停就更難控制。我失去平衡，但同上次唔同既係我今次唔係即刻跌，而係feel到自己將會跌但又無能力阻止跌勢，只有慢動作咁跌低。
我落地既時候，唔係屁股坐落地，而係兩邊小腿同我個膝頭哥屈住跌落地下。如果我跌既勢急啲，我個膝頭哥應該已經扭傷，好彩宜家只係感受到少少拉住果種赤赤痛。
我屈住雙腳、成件藝術品咁陳列喺雪地上。如果要為呢件藝術品改名，我會叫做《「屈屈」寡歡》。我伸手想去除個ski，但今次我隻腳既屈住好難除。我吸一口氣，忍住少少痛用力伸手按上ski既安全扣，感覺ski好似脫離咗。可惜我又唔夠手長又無力拎開我個ski，只有繼續維持住我藝術品既姿勢。
呢個時候，教練返轉頭搵到我。佢同樣以好似欣賞藝術品既眼光望住瞓咗喺地下既我，悠悠地同我講：「噢。你呢種跌法應該算係最差既跌法了。」
教練幫我拎開我已經解咗既右腳ski，我終於可以將右腳伸直，膝頭哥既壓力同疼痛慢慢消退。我起返身著返ski，然後同教練一齊慢慢滑返落去。
就係咁兩小時過去，我既第一個滑雪堂以跌倒告終。雖然覺得可惜，不過我倒不敢勉強自己再上去滑多次。弟弟進度之快令我喜出望外，對自己既進度都算係收貨，至少下次再黎滑雪既時候知道自己要做啲乜野、練習啲乜野。
早排睇咗一本由推理小說家東野圭吾 (《神探伽利略》系列既原作者) 敘述佢自己學snowboard既舊作《挑戰》。書入面有一段作者解釋點解佢想學snowboard既段落，我覺得正好總結我今次學滑雪既經驗：
「我是奔五的大叔，不折不扣的中年。到了這個年紀，學習新鮮事物進而不斷進步的機會少之又少，反倒是早年掌握的技能慢慢退化。所以，不管是多麼小的事情，「昨天不會，今天會了」的感覺總令我欣喜不已。」
今次黎學滑雪，我並無期望自己一學就識，更加無想過要成為滑雪高手。但我所追求既，可能就係呢種「昨天不會，今天會了」既成功感。
其實自從移民後，久不久都會feel到少少無力，因為好多野都係新手，撞板多過食飯。不過亦因為係新手，生活上多咗好多「由零變一」既機會，令中佬既我可以再嘗每天獲得微小進步既充實感。
呢個應該係「中佬的浪漫」吧。
(滑雪篇暫告一段落)