舊同事Alice(化名)係一個意大利裔、喺多倫多土生土長既女仔。因為多倫多生活成本對佢黎講太貴，所以一個女仔搬咗過黎Calgary 。
Alice細個由嫲嫲湊大，所以識聽意大利話。但因為父母都無乜同佢講意大利話，所以Alice都係典型識聽唔識講既移二代。
Alice最近參加咗一個叫做Italian fluency class既online course，每個月一百蚊加紙。每日個老師都會俾assignment，每星期亦有兩次一個鐘一對一既online對話時間，仲可以任何時間用online chat問老師野。
我見Alice咁committed，好奇問佢點解忽然間咁想學意大利文。
「我其實想學好耐，不過總係提唔起勁。一回頭發現自己三十喇，再唔學就太遲。」
我跟住問佢學成點。
「宜家大咗好難學呀，因為我個腦係用英文去翻譯做意大利文。但一個語言同另一個語言好難直譯，無咗果個語言既native brain，宜家唯有將勤補拙。」
歸根究底，Alice真正想學意大利文既原因係佢好鐘意意大利呢個地方。
最近佢同男朋友返意大利渡假，點知好多蝦碌事件發生。例如佢地租咗架車，點知架車無啦啦cancel咗。佢男朋友嘗試同當地人交涉，但因為當地人啲英文唔好，結果雞同鴨講。好彩Alice都識講少少意大利文，勉強同果度啲人溝通到，最終算係化險為夷過咗一個「難忘」既假期。但呢件事令追求完美既Alice加大咗要學好意大利文既決心。
「同啲意大利人講意大利文果陣你知道自己都講得唔係幾make sense，仲要諗好耐，講野一舊舊咁。我果一刻覺得好annoying。我要一開口就講到我想講既野，所以我宜家走去認真學意大利文。」
我始終覺得學任何事，有動機同無動機係天淵之別。例如Alice喜愛意大利，基本上佢話每年返去佢都唔介意，所以佢有動機學好意大利文。
回顧黎咗加拿大幾年，兩姐弟大概本身都好缺乏動機，所以好難要佢地提起勁學中文。畢竟從來「學中文」呢個動機，只係來自我同老婆。
今年我發現弟弟自從睇過三國演義之後好鐘意啲中國既故事，特別係歷史故事，於是我搵到一個可以植入弟弟內心既動機：學中文可以睇好多中國歷史故事。
我後來再搵咗個三國志既online game同佢一齊玩，一路打機、一路學中文。「打爆機」成為弟弟既其中一個學習動機，所以無論係遊戲既人物名定係遊戲介面上既每一個command，佢都有耐性去學習。
事實上，我覺得打機學中文對弟弟都幾有效。最近同佢睇書，佢竟然識得讀「嚴肅」呢個我覺得對弟弟呢個番鬼仔黎講算難既字。我問佢點解識讀，佢話：因為我認得三個演義入面，有一個人叫「嚴」顏、一個人叫魯「肅」。
家姐就比較難攪啲。除咗聽中文歌同埋去叫珍珠奶茶果時睇menu，其餘大概任何中文野都提唔起佢對學中文既興趣。
我諗呢樣野都急唔黎。好似Alice咁，都三十歲人先丑起勁去學母語。到家姐有一日搵啱個動機想學，就自然會學吧。
不過阿囡，如果你到時先搵你老豆我教你中文，我係收一百蚊加紙一個鐘既。