珍珠奶茶，台灣人鐘意叫做「珍奶」。
唔知幾時開始，我好鐘意飲「珍奶」。可能係我結咗婚搬咗去將軍澳之後，樓下有間貢茶。因為太方便，一行過就買，結果慢慢地上咗癮。
加拿大其實都有好多間珍珠奶茶店。除咗香港都有franchise既貢茶、CoCo、 一芳、功夫茶、老虎堂、幸福堂，仲有一啲本地開既品牌。
最近知道喺Calgary有一間新開既珍珠奶茶店做買一送一，於是走咗去幫襯。除咗一啲大路飲品，呢間新店都有啲未飲過既新口味，例如係「mochi奶茶」系列。
因為買一送一，排隊都排咗好耐。終於輪到我地order，職員聽我講完我既order後用熟練既語氣問我：「先生，你想要幾多糖？」
我其實好怕面對呢條問題。因為呢條問題提醒咗我：我係飲緊糖水。問你想落幾多糖，即係等於問：「先生，你想要少少唔健康，定係好唔健康？」
更大鑊既係平時啲舖頭多數都有幾個甜度俾你揀：0%、30%、 50%、70%同100%。但呢間新鋪只可以俾你揀0%、50%或者100%。
我天人交戰一番後，緩緩地講出一個我無諗過自己會講既答案：「0%」。但我講到percent個「per」果時已經開始後悔。
我後悔自己做咗「半吊子」 – 想要一樣，但又唔想要哂。
食甜野但又要唔甜。
飲凍野但又要走冰。
食buffet但又要唔肥。
等咗十幾分鐘，職員終於叫我既號碼，可以出去攞野飲。我飲咗幾啖，老婆同兩姐弟好奇地問我杯野係咩味，我卻唔知道從何說起。
一杯「無糖既糖水」，好禪。無返咁上下佛學修為係好難參透。我一邊細味呢杯咁有襌味既奶茶，腦內一邊不斷重複呢句說話：
「一不做，二不休」。
PS：兩星期後再幫襯叫咗50%成件事make sense哂
