黎咗加拿大幾年，一直無返過香港。雖然同香港既聯繫倒係不曾中斷，不過，始終不及自己親身再踏足呢個家園。
喺日本玩咗幾日之後，我地終於返香港了。
晚上八點左右，飛機降落香港國際機場。飛機降落跑道既一刻，心入面有一陣陣激動。我喺心入面同自己講：
「我返黎了」。
落機後隨住唔算太多既人群行去入境櫃台，感覺既熟悉又奇怪。以前行親呢段路，總係帶住一個極唔想第二日返工既軀殼同一堆想送俾人但更想自己食既手信。
而更重要既，係帶住滿滿既旅行回憶：「哦，日本落雪好靚呀！」
今次我帶住既唔再係旅行既收穫，而係幾年實實在在既異地生活經歷：「哦…落雪呀……咪剷下佢咁囉。」
呢段路，本來應該係一段回家既路，但今次香港首次成為咗我既destination。
為咗方便近屋企人，我地喺以前屋企附近租咗一間service apartment住。
到達service apartment已經差不多夜晚十點幾，一家大細都好肚餓。我走落樓下商場，舖頭都差不多已經全部關門。我諗都唔駛諗，雙腳已經自動帶我行去附近一間OK便利店。
一路走著走著，忽然覺得去加拿大呢幾年好似發咗一場夢咁。因為呢種夜媽媽落街買野既「親切感」，令我覺得自己好似無離開過一樣。
我一手拎咗4個合味道杯麵埋counter俾錢。我拎返我張八達通出黎，不過一過機，我並未有聽到果一聲久違了既「嘟」。
我不由得慌張起黎。唔通走咗幾年，八達通宜家唔係用「嘟」聲？其實我一直覺得用Mario（孖寶兄弟）攞金幣果下「叮」聲都應該會幾夾。
便利店阿姐望下我，好有禮貌咁同我講：「先生唔得喎，你再試多一次？」
我試多一次，依然俾唔到錢。阿姐一臉疑惑，不過我忽然醒覺，一邊苦笑，一邊拎張一百蚊紙俾佢。
我跟住行返去地鐵站俾咗張八達通個站務員check。果然，我張八達通已經deactivate咗。
我有一瞬間覺得自己「out」咗。 我同時發覺用「out」黎形容自己同時代脫節呢種說法都係……好out。
