好想要一樣野既時候，就會覺得啲時間過得好慢。
例如你好想小朋友食一餐飯食快啲，你就會覺得佢係已經食咗三日三夜。
見咗工只係幾日，不過我好心急，覺得好似過咗好耐都未有消息咁。一路喺公司做野，一路有少少心不在焉，心入面不斷幻想如果我收到個offer既種種可能：我會點同老細講？佢會有咩反應？佢會唔會留我呢？佢留我我又留唔留好呢？喺加拿大離職…駛唔駛請人食散水餅？
胡思亂想咗一個上午。然後，到咗早上十一點十一分。
正忙得不可開交之際，手機出現有新電郵既notification。俾著平時我係唔會理佢，但今日例外。
我按下個電郵icon，發現封email個subject係Offer of Employment。
襟入去睇內文，我確信呢個email並非一個玩笑：We are very pleased to present with a full-time opportunity to join XXXX as a xxxxxx. Congratulations! Please confirm receipt of this email at your earliest convenience…..
我真係得咗！
我既心情好似當日收到真道取錄家姐果封email咁興奮。我亦同當日一樣，即刻message咗老婆。
仔細去睇成個offer既內容，發覺其實並非所有野都比宜家份工好。不過我知道自己去意其實都幾堅決。
正如移民不一定比留下好。喺我未知道移民好唔好之前，我已經肯定知道留下既好了。但至少我想喺自己仲有決心同能力離開既時候去試下。
老細咁啱上星期喺美國返咗黎，今日係最後一日喺office。換句話說我仲有一個下午既時間去同老細親口講呢件事。
點樣同老細「表白」好呢？
（待續）