音小簡介會2017問答環節

音小簡介會比想像中有趣：陳校長其實意想不到地風趣。下面節錄左簡介會既問答環節比大家參考下：

問：學校會點揀小朋友？駛唔駛一定基督徒同埋識音樂？

答：面試2部分，小朋友同家長各自分開面見。小朋友面試係十個小朋友一組，會係唱遊、遊戲中同小朋友溝通；家長就主要係分享下教育理念，傾下計。（好似唔算有答到個問題…)

問： 學校重視音樂同宗教，學術會唔會比出面淺？出到去比語文能力同學術根基會較他校差嗎？

答： 學校係好重視語文；只要學好語文，長大能學到更多既能力。學校亦好鼓勵閱讀；每天都有早讀，課室有好多書睇。學校仲會攪好多唔同活動比學生從中學好語文，例如講故事比賽、話劇等等。學校DSE既成績超越全港平均。

問：小朋友如果鐘意科學多D，音小適唔適合佢？

答：肯定適合。好多音樂家其實都係數學家同科學家，例如發明畢氏定理既Pythagoras就係一個音樂家。學校係數學比賽度都有攞奬，之前亦曾經有一位十四歲既學生入左港大，成為最年幼入港大既學生。

問： 本身有2位小朋友，若哥哥入左音小，弟弟機會會係點？

答： 學校好重視家庭教育，所以會盡力令細路妹入埋黎讀，教晒一家人。

問： 自己小朋友體力好好，不過音小好似較重靜態既活動，到底學校適唔適合佢？

答： 其實學校唔止得音樂既活動，學校每級有十幾種課外活動比小朋友揀，仲有校隊；例如足球、籃球、泳隊都有。但若你想你小朋友入到港隊咁或者我地真係未必適合，體藝可能好D。

問： 若有活動係學校本身無攪，家長想自己攪搵埋教練，學校提供場地；學校會唔會支持？

答： 我地係一間好開明既學校，有商量。其實你已經乜都有我地淨係出場又何樂而不為呢？以前都有試過。

問： 中學部DSE成績好唔好？幾多％入讀到十大院校？

答： DSE超越香港平均數，75% 入到DEGREE，其他入其他課程。

問：我子女又唔係基督徒又無乜音樂天份，音小適唔適合佢？

答：無論你係咪基督徒我地都歡迎，我地相信神既愛比所有人既。小朋友入左學校經過學校薰陶，其實好多都會慢慢信主。其實無話唔適合；我地教小朋友音樂唔係一定要佢做音樂家，主要係帶比佢樂趣同享受。

問：本身無信教亦無學音樂，會唔會較難考入音小？

答： 唔會。我地係一視同仁，神愛世人。若小朋友現家無學音樂，千祈唔好急比佢學。因為佢會以為學音樂只係為左應考。學校呢度係有信心教好小朋友音樂既。

問： 係咪所有同學都係學同一種音樂，定係會因材施教？

答： 每一個小朋友都鐘意唱歌，合唱係大家一齊學；樂器學習就係個別學既，跟小朋友興趣。

問： 音小既音樂師資係點？

答： 樂器老師超過一百個。如果佢係major作曲佢會教作曲，教voice既專教voice。

問： 音小教中文係普教中定粵教中？

答： 主要母語用教中文；5, 6年級主要係普通話。

問： 音小功課多唔多？

答： 功課一般係學校度都做得晒。我地估計初小大約每日要30 – 45 分鐘，高小45 – 90分鐘。通常小朋友會係導修課既一小時內做晒佢。

問：音小一條龍係咪100% 小升中？

答： 係100% 升返。