Photo credit: lihie jacob
有一晚對緊阿囡本家課冊果陣，阿囡同我講：爸爸，我比你睇下我既「筋斗小子」丫。
心諗乜我真係咁out咩，最近唔興蛋黃哥或者比卡超反而開始興呢個「筋斗小子」？不過target小朋友既公仔個名係咪應該cute少少？「碌碌仔」係咪好啲？
正當我一陣迷網，阿囡輕輕一笑，然後拎左呢舊野出黎：
一個剪左既廁紙筒用膠紙包住粒波子。
呢個係筋斗小子？唔好講筋斗住，呢舊野無手無腳有邊忽似小子呢？仲有做乜無啦啦做做下功課拎玩具出黎呢？
阿囡跟住好快拎埋張科學科工作紙比我睇，睇完我就恍然大悟了。
原來「筋斗小子」係阿囡係科學堂度跟住老師整既實驗裝置。小朋友拎住呢個裝置係塊斜紙板度碌佢落去，學習重心點影響佢碌既快慢。
阿囡話堂堂科學堂都有實驗做，每一堂老師會先示範一次，同學跟住就拎材料動手做。做完每一組都會有工具比佢實驗一下佢既製成品work 唔work，work就寫低「成功了」：
跟住發現呢一期阿囡科學堂既單元係叫做「神奇小玩具」，每一堂同學都可以透過動手整一個簡單小玩具黎學重心既原理。除左「筋斗小子」，佢地仲有整過「不倒翁」添。下一個單元「齊來玩玩水」就會做一啲同水有關既實驗，例如整隻泥膠船浮係水面。
聽完阿囡興高采烈既介紹，難怪佢地咁鐘意上科學堂啦。回想起自己細個果陣科學堂都係用「學踢波唔用波」既方法：一味講個理論但無得實淺，宜家既科學堂真係生動好多。
講返份家課，原來同樣精采。唔駛抄十次「重心」，唔駛背左成個實驗過程，而係將個科學實驗延續。例如「筋斗小子」既家課係：「你可以用咩方法等筋斗小子碌得快啲? 」，側邊有提示：斜板既斜度同埋重量。
於是我問阿囡佢覺得果兩樣提示會點影響個結果：斜啲定無咁斜快啲？重啲定輕啲快啲？阿囡估完就自己拎住「筋斗小子」試，做完後畫返個圖畫解釋佢既設計就可以了：
咁考試呢？
呢個更加係家長福音：學校今年一年級既科學科試行無考試。我覺得學校可能其實都係做緊一個大實驗：試下如果唔考試，對學生科學既成績有無影響。
有人會話：「下，咁咪即係科學堂變手工堂？」「佢地咁樣咪學唔識個科學既原理囉？」「佢地點記得住架？」
或者的確如此吧。不過我覺得上科學堂更重要既係學習科學既精神 – 不斷假設、不斷實驗同嘗試、不斷求証。如果我地淨係識記住前人已經做過既實驗結果，科學點樣會有進步？
再者，能夠令小朋友自豪地擁有「成功了」既成功感，令佢有動力自己再發掘多啲，係我心目中呢一樣野先係最難能可貴。因為做左大人，我地習慣左放大我地既「大鑊了」，但忘記左「成功了」果種喜悅其實可以帶黎好大既動力。
好期待阿囡下一個既科學實驗，唔知下次個實驗又會叫做咩名呢?
