九月三日，阿囡終於開學返小一。
睇住著上校服既佢，並未有「終於大個囡啦」的感慨；畢竟佢間學校件校服只係一件polo shirt，可以大個囡得去邊。雖然佢孭上書包既一刻我有諗起我阿嫲當年講既一句話：「嘩，乜個書包仲大過你呀」。
開學既第一個星期頭幾日返半日等大家適應，第4日開始返全日。之前都講過真道既返學時間比一般學校長，計返勻分分鐘長過我返工（尤其扣埋係公司hea既時間)；阿囡本身仲要係口水多但體力少，好好奇佢上上下堂會唔會訓著左。
執書包耐過做功課
頭一個月每晚我同老婆同阿囡都係review一次佢啲功課，教佢執書包；攪完基本上已經要趕頭趕命上床訓覺。
真道每日大約兩、三份功課左右，我幫佢check既時候都大約做到一半什至做完； 而且阿囡以前間幼稚園都chur chur地慣左，所以都未算太大挑戰。最大挑戰反而係執野 – 幼稚園科目少，啲書又日日帶唔駛點執；相對宜家每日上既課堂唔同，而且需要佢地自己將已經無需要再帶既野自己整理，所以執書包既過程往往耐過做功課。如果講「快啲啦」係要罸錢既，我諗我已經破左產。
午飯的挑戰
學校係開學約3星期左右攪左一次家長晚會，除左認識班主任、介紹下老師同學校政策，亦都講左學生同老師係學校面對既挑戰。其中午飯時間相信係最「扣人心弦」既環節。老師講左兩個例子：
- 學生食唔晒既飯要倒落廚餘筒，但無奈學生啲眼界太差倒晒落地下；倒完幫手抺，但越抺個污糟既範園就越大
- 其中一日既午飯係雞肶 – 有部分同學懷疑未試過食有骨雞肶而對隻肶束手無策
雖則知道(2)一定無阿囡份，但不由得腦裹面幻想阿囡將啲廚餘倒落地下果個畫面。宜家明白點解當年佢first in果時要考拋豆袋，可能想睇下佢地啲眼界係咪真係咁差。
宜家先season 1幾時season finale…
呢一個月每日放工睇住阿囡，感覺好似睇緊walking dead d zombie 無精神係度遊魂，心諗season 1第1集你已經變左zombie了，幾時先到大結局？Season 2你係點樣變返正常架？
所以如果問適應左未，可能阿囡已經習慣左校園既生活，未適應既反而係我。當然，只要一上whatsapp，就會發現自己「you are not alone」。
