一心諗住自己同阿囡一齊自學coding，經過左一星期既電腦圖畫書伴讀，阿囡算係掌握到我覺得需要明白既概念。覺得不如真係比佢玩下睇下coding啱唔啱玩先啦。於是就開始同阿囡試玩「一小時玩程式」。
一小時玩程式 (hour of code)
一小時玩程式(hour of code)係由美國一個叫做Code.org既組職發起既活動； 佢地提供左一個免費既平台比4歲以上既小朋友係遊戲入面學寫程式。呢個平台支援45種語言，吸引全世界180個國家過百萬既小朋友參加。
Code.org相信程式係可以靠自學，佢地平台上設計既遊戲有淺有深，只要你想試，隨時都可以上去開始 – 唔駛比錢、唔駛登記。每一個遊戲／ 課程大約可以係一小時內完成，當然你想再玩，你係可以試晒平台上所有既遊戲。
嘩！好多唔同既遊戲比你試玩！
講到好玩成咁，咁實情有咩遊戲咁巴閉小朋友會想學先？去到佢地個website一睇，嘩！又真係好多野玩wo:
原來佢地partner左好多唔同既遊戲，其中最勁係partner左Disney入面幾個hit既故事角色 – Frozen、 Rapunzel、Big Hero 6。心諗如果有Elsa阿囡都唔想玩，大概都應該可以唔駛叫佢學了。
於是叫左阿囡埋黎，加多句：嘩，係Elsa教你寫code架！阿囡一睇到Elsa，即係坐底話學 (奸計得逞mode)。
咁Elsa點樣可以教到你寫code呢？
係電腦度(試過用手機都一樣得)開左Frozen既遊戲就會進入以下既畫面：
畫面既左手邊你會見到Elsa已經係度，呢個就等於平時我地打機果個畫面吧！右手邊就係我地比instructions個game既地方 – 亦即係你用黎寫code既地方。
Frozen呢個遊戲總共有20關，每一關Elsa / Anna都會係畫面右上方講佢想我地幫佢做d咩。例如第一關：佢要畫一條直線。
係畫面中間有一個叫做Blocks既地方，入面放左一塊塊好似puzzle既code比你用。只要你揀啱要用既puzzle (code)，拉過去when run底下，然後係左手邊襟橙色果個run掣，Elsa就會跟住你既instructions去做野。
例如第一關個指令係拉個move forward既puzzle過去，run完Elsa就會邊行邊畫一條直線：
成功左之後就會去第二關，但如果你寫錯左，Elsa都會提下你：
阿囡學成點呢？
阿囡玩左第一關明白左個道理，我就比佢試下第二關。由於個遊戲入面有少少關於數學既概念佢未學(例如角度)，所以佢亦唔係可以關關都處理到。
另外，第四關開始出現左個係coding既世界度好重要既一個concept – loop，簡單地講就係叫電腦重覆咁做一件事（佢另一個設計得好既地方係佢會有條片教一教你先）：
阿囡都唔係好掌握得到個concept，不過跟住Elsa既指示都可以完成到個task。
結果係我既協助下，我同阿囡玩左大半個鐘，玩到第8關我地就停。
總結
總結阿囡玩左接近一半關數，覺得佢都pickup到基本既program程序，識得將多個指令(puzzle)結合去完成一個task。反過黎講都有一d未係好pickup到既：
- Loop呢個concept真正可以點用
- 一d佢未學過既數學 – 例如角度
我覺得其實寫code，什或學任何野，最緊要學既精神就係學點錯，同埋點樣改返個錯(debug)。佢宜家識唔識寫loop唔緊要，重要係佢培養唔好怕錯同錯則改既精神。呢方面呢個遊戲比左好多機會佢試，好多機會佢錯，亦可以令佢學習點樣改正返錯誤，所以覺得呢個係一個好好既經驗。
更重要既係，佢完左同我講：「好好玩呀！就算唔係Elsa，我都想繼續試！有無其他既關可以試呀？」
所以決定左下次再同佢試另一個遊戲，又睇下佢玩成點！（後來發現…Elsa原來係比8歲或以上玩，所以下次會再試其他年幼少少既）
