真道第二次面試同第一次面試唔同，要同時見晒小朋友同父母；成個interview 40分鐘左右。由於已知其中一間心儀既學校音小收左阿囡，心情相對無咁忐忑。
面見小朋友
我同老婆阿囡跟住老師指示去到課室出面等。等左2-3分鐘就入得去，入到去見到成個班房d枱搬走晒，剩返一張枱近門口。兩位老師坐係另一張近璧佈板既大枱。
行到埋去我地3個坐底，都未坐定其中一位老師同阿囡講：「我地宜家請爸爸媽媽出去先，你幫我送佢地出課室門口跟住返黎坐底」。睇住阿囡個面色一沉手又震，我同老婆慢慢起身拖佢行去門口；去到門口阿囡拉住我地唔肯比我地出去，仲發脾氣dum埋地。老師見有少少膠著，提議我地帶阿囡出去洗個面再返入去；擾釀左一陣後，阿囡入返去我地就出面等。
面見家長
過左7、8分鐘老師叫返我地入去，一開口就話阿囡表現得好好，d 英文生字讀得好好，一開始可能唔慣個環境。我同老婆借機都安慰同鼓勵返阿囡。老師跟住叫阿囡坐去近門口果張枱度自己畫畫，然後我地坐底做家長面見。
家長面見既問題有：
點解要揀真道？
記得當時答自己唔崇尚名校，唔要求佢地有咩學術成就，最緊要係佢要鐘意返學同學野；跟住舉下之前聽真道簡介會佢地點樣生動咁教d小朋友，同埋講佢地個課程與時並進 (e.g. 媒體科)；另外講左佢地有IB，希望第時阿囡多d升學選擇。
若你個囡學習上有問題，你會點處理？
其實都係由個小朋友出發吧! 學習問題有可能係能力，可能係佢心情 / 興趣，亦可能係環境。我同老婆都係講大約點樣同學校一齊搵出個原因然後一齊幫個小朋友。
你個囡有咩強項同弱項？
好似見工既問題 – 亦好彩佢問左呢個問題，我地有機會比老師知道阿囡慢熱既性格，解釋到佢點解一開始要我地出去時佢咁驚咁緊張。
後記
見完其實我同老婆都好滿意大家既表現，不過阿囡當住老師面發脾氣諗住都衰硬了。點知最後竟然收到取錄email….真係開心到彈起！
想請問second in時英文是in 句字還是生字
PO多謝你既留言！講真真係唔知…老師同阿囡有講係生字，我記得仲隠約望到佢地有份好似配對咁既問題紙問阿囡； 但唔sure佢有無問埋佢英文句子。不過平時囡間學校都會同d老師對答下，我估簡單既對答佢都應付到既…
你好 想知有冇問到對真道十一年課程嘅睇法 如有 你點回答
你好！
老師無問過我呢個問題，雖然上年自己準備既時候上網見話有人會問。
純粹個人感受：我的確唔明白真道只讀十一年呢個構思既理由，但對我黎講十一年定十二年唔係太大關係 － 我要既係一個令小朋友鐘意自主學習既地方；如果十一年出到一個願意終生學習既人，我願意付出讀少一年既代價 (而實情係至少我比少一年學費…:P) － 包括佢公開試有機會無人地考得咁好。
都見到你女兒除咗真道之外仲有音小同埋優才嘅Offer點解你最後都係會揀咗真道呢？
Ceci你好
音小無揀因為比較遠、學費較另外兩間貴好多。
優才同真道之間講真我無去分析邊間學校硬件定軟件好啲、邊間公開試成績好啲、邊間攞奬多啲。揀左真道純粹覺得曹校長講既野好中自己想要既野，感覺真道風氣自由，希望阿囡係呢個環境度會鐘意返學。
見到你囡囡都好叻啊！想請問係咪讀出名的幼稚園? 請問覺得讀私幼係咪會著數d? 因我小朋友出年K1,有幾間OFFER, 但唔知點揀好。我都係預算將來考直資小學
CL你好！我心目中既名幼係九龍塘一眾幼稚園同埋幾個大牌子如維記、學之園，不過我個囡都唔係讀呢啲學 校，只係屋企附近私幼。
我唔敢講邊類幼稚園會令小朋友本身考小學好啲，因為都好睇家長同小朋友嘛！
讀私幼反過黎講係家長們既意向比較會想考直私，所以家長間既情報會多啲，學校亦相應多啲支援。例如我聽過學之園每年會請啲舊生分享佢地考小學既經驗。
你好，想問你覺得私幼以英文教學為主同有學劵區內較出名既幼稚園對報讀直資小學有沒有大影響？
Yannie你好
好坦白講我其實不知道，因為我無乜research亦無讀過學券學校，唔知道佢地點教英文。我只能夠話我覺得阿囡讀果間私幼 (主要英粵兩位老師) 學既英文應該幫到佢當年in直資小學；真道老師interview果陣有讚過阿囡啲英文唔錯。
到我地宜家移咗民，我依然覺得阿囡英文pickup到，當年幼稚園係幫咗好大忙 (因為我地屋企無刻意去同佢講英文去製造所謂英文語境，炳佢都係用純正廣東話）。
介唔介意分享你囡囡果陣讀邊間幼稚園？係咪Tko?
我私底下覆你 🙂
可否再一次分享，女女幾年前喺香港讀邊間幼稚園？
haha我其實係無分享過既，私底下答你 🙂
請問2nd in 家長係用英語還是廣東話?
我地係幾年前in的了，當時係廣東話。我相信宜家都仲係。我估好少學校要in埋家長英文…
想問女女是否很喜歡學校?家長小朋友是否都不會太大壓力?thanks
YES!我地同阿囡都好鐘意真道。如果我地無移到民，應該會一直讀到畢業。以香港既standard我覺得算係無乜壓力了，阿囡讀咗兩年，除左一年級果陣我地緊張少少之外，基本上我地都唔駛篤佢讀書。黎咗加拿大之後阿囡可以完全自動波，我覺得一大原因係因為真道俾咗個好好既基礎佢。
我知道真道低年級以中文作教學語言，見你另篇文章小朋友過到加拿大全英語環境都尚可，但其實會唔會係要老師/學校多啲配合先得？定係你覺得主要因為小朋友適應力強啲呢？
如果你當初知道要移民，而有其他選擇，你會唔會仲係揀真道呢？
thanks thanks
Ada你好！
晤…坦白講我唔知道真道教英文既程度如何。唔係想特別讚阿囡，不過我覺得佢適應力的確係強。
我覺得係阿囡幼稚園果時學校prep佢啲英文prep得幾好，所以受用至今吧。
如果我當初知道要移民：當日去考小學果時其實我都有少少想過他朝有一日會移民㗎，不過無咁快之嘛。所以對於你個問題，我個答案係yes。
我其實覺得宜家啲小朋友學language其實學得好快，所以我覺得令佢「唔怕講英文」同「令佢唔怕學習」緊要過「學好英文」。而我覺得真道做到我心目中呢兩樣野，阿囡入咗去之後個人信心大咗，我覺得呢樣已經足夠。
唔知算唔算答到你既問題？
Hello, 好校爸，想請問你當年見真道既心得，有無d 對真道既睇法可以share? 因為黎緊我地都要去2nd in🙏🏻🙏🏻萬分感激
你好！好難三言兩語講得完，你如果想感受下喺度返學係點，可以睇下我當年寫阿囡返小一既故仔。
我諗可以講既係我覺得真道教既小朋友好「生」，好靈活。好似阿囡咁，佢未必係讀書最叻果個、或者運動最勁果個，但係個個都有自己既主意。學校鼓勵三自：「自學、自理、自省」，我覺得自學既精神對阿囡喺加拿大呢度讀書個根基好有幫助，基本上阿囡黎到都幾容易就接得上，感覺真道同喺外國學習既理念比較接近。
若你心儀一間小朋友自由發揮、你亦唔係太介意佢地啲成績要點點點的話，我覺得真道係一個好好既選擇。
不過我地都走咗幾年了，希望有其他家長喺度補充下最新既資料吧！
你好，好校爸，
首次看到你的分享，感謝你咁有心將每個簡介會及面試體驗用文字記下，從文字間感受到實在的客觀感覺大於個人主觀感受。
由於考直私所需的語文能力(特別英文能力)相對要求高，我想請問一下，我仔仔英文溝通日常生活一問一答是無問題 (畢竟有姐姐英文溝通及我本人都會間中以全英同仔仔對話)，但對於認字(閱讀)仔仔就沒太大信心，現在5Y3M比較喜歡聽書，不能自己閱讀，但面對ORT stories (level 6-7 stories)，可以理解故事及以英文回答書後的問題。
以上情況，以你的經驗，可否分享有什麼想法/意見呢?
Bobo你好。阿囡當年啲英文我唔覺特別好；我地無同佢講英文，佢亦好少日常要用英語對答(除咗返幼稚園果陣)，唯讀係佢好肯睇書。我記得阿囡話當年老師有考佢認字，不過唔知有無同佢地對答。
不過我講緊既都係6-7年前既事了，唔知仲係咪applicable？可能宜家既考法又不一樣吧。特別係真道，我諗佢地連校長都轉咗了。