漩渦

好痛心睇到學校老師捲入呢次既漩渦。好痛心睇到有人受傷害（身心都有），社會、學校撕裂、割蓆，大家拼命地去為大家找錯處。

「嗱！你睇下你！你話我你咪又係咁！」

幾時會出現呢句對白？

兩公婆又或者同小朋友鬧交果時成日出現。

咁大家互數完有無結果？

只有仇恨。

有一次家長講座，Miss Yuen講點解我地同小朋友connect唔上，你有你講，佢有佢唔聽？因為大家唔同perspective。或者唔係因為我同阿囡唔夠冷靜，而係大家根本用緊完全唔同既角度去望緊、講緊一件事。

我其實諗寫唔寫呢篇野都猶豫左好耐，因為我好怕。係呢個非黑即白既氣氛下，無論你點講、持咩立場，大家都好容易立即起底分派歸邊。同時又好害怕多一個message，多一個人傳，就多一個小小既火花慢慢變大。

好似今次老師呢個事件咁。

老師今次不對，相信老師自己都已經好清楚。作為真道既家長，我希望老師會緊守真道精神去自省、改變同埋接受後果。我亦深信學校會好好處理呢件事，唔輪到其他人說三道四指指點點，更唔希望有人借題發揮，用呢件事成為大家互相謾罵既導火線，什至係變換政治籌碼。

記得上次正生書院陳校長黎真道講talk，講過一句說話：「家唔係講道理既地方，係講愛既地方。」我仍然好天真咁希望，香港同學校呢個家，我地就算意見不一都能共存。

無論如何，我依然proud to be一位真道家長，依然對呢間學校有信任、有希望。