喺加拿大做野，同同事small talk (吹水) 大過天。不過做咗幾年野，發覺喺加拿大同喺香港同同事吹水都有微妙既分別。
以前喺香港同事一圍埋傾計，基本上就係「小」老闆。但黎到加拿大，唔好話「小」老闆，其實講公事都好少。
其中一個呢度啲人成日講而香港好少人會講既係天氣。初初黎到返工，啲人個個一開口就問「How’s the weather today?」，令我好唔慣，心諗你自己望下出面咪知囉。做耐咗先慢慢發現呢句野係同「你食咗飯未」一樣既開場萬能key。
不過，我越來越覺得呢個開場白其實好實用。特別係因為我宜家remote work，同我傾計既人大部分都唔喺Calgary，所以講天氣其實make sense，仲要幾多野傾。例如多倫多呢幾日啲天氣好差攪到有啲地方停電，了解下啲同事有無受影響都傾咗5分鐘了。
事實上，又有乜野話題可以咁點到即止：5分鐘就講完，大家唔會太投入、又唔會傾到唔捨得完？
除咗天氣萬能key，同呢度既同事傾計講去邊度旅行、stream緊咩劇、寵物或者運動，基本上都唔會死錯人。我仲發現原來傾「動漫」喺呢度都有巿場 。我無諗過我竟然會有一日用英文同個西人講：「你有無睇過《進擊的巨人》？」
▌ 語氣：平淡v.s. 誇張
我覺得黎咗加拿大之後，每次同同事傾計講英文果陣，自己啲語氣都要誇張啲先match到大家個energy level。
明明講緊啲好普通既野，我諗喺香港用廣東話應該會答「係咩」就完事。但身邊既外國同事，特別係女同事，會高8度咁講「OH REALLY？」「OH WHY？」又或者係「OH THAT’S INTERESTING！」
我又唔覺得佢地係特登扮野，我諗只係文化差異，佢地熱情啲？但諗落，如果你將佢譯返做中文，「OH REALLY？」、「OH WHY？」同「OH THAT’S INTERESTING！」咪就exactly係港女傾計必殺技既「真係㗎？」、「點解既？」同「好叻呀！」囉？
所以宜家每次同同事傾計，完咗我都覺得自己成個港女咁可愛咗。
—
不過講到尾，我覺得兩地同事傾計最不同既地方應該係：喺香港，傾完大部分時間都係死返去做野；喺加拿大，傾下傾下就放工了。