大家覺得喺AI崛起一代成長既小朋友，最需要學識咩skill？
宜家AI真係發展得好快。 忽然又彈出咗個Deepseek，然後轉個頭又全民chatGPT整宮崎駿style圖。淨係啲唔同AI model既名都未記到又已經出一個新既。明明早幾個月都仲覺得AI做唔到既野，轉眼間忽然又做到。
宜家都尚且如此，到兩姐弟大個果時個世界會係點？
早排睇咗一本叫做《21 lessons for the 21st century 》既書, 作者認為正正因為AI發展得咁快，未來既workspace改變既速度亦會比宜家更快。我地父母一代可能掌握一個技術夠做一世；到我地呢代雖然成日話「終生學習」，不過喺自己領域內keep up-to-date都勉強可以生存。但到下一代，好可能係每隔幾年就成個行業改變甚至消失，每個人都可能要經歷好多次行業轉換，學習「由零開始」。
要不斷由零開始重新學習再適應，我諗移咗民或者有考慮過移民、特別係好似我咁上咗少少年紀既人，應該好清楚有幾大壓力吧。
如果咁講，可能未來小朋友最緊要既skill，唔係STEAM、唔係coding，係flexibility。
老實講，我係幾為弟弟擔心。弟弟本身已經好需要秩序、好唔鐘意變化、好唔flexible，唔好話未來了，就算宜家日常生活既轉變有時都好難適應。
還好我發現加拿大呢度至少有一樣成日變、人人都可以用黎學習適應同遷就既野 – 天氣。
話說早一兩個星期，Calgary好暖，每日最高有零上十度。草地終於擺脫積雪再次蒲頭，大褸、雪boot可以收埋，春天終於來了。
但知weekend一場雪，將一切reset。
尋日朝早送弟弟返學，學校既草地再次變成一片白色。好啦，winter is back I am ready。點知尋日日頭又忽然熱返，到我放學去接弟弟，草地上既雪又融哂，大地又回復生機。Spring is back！
然後尋晚又落咗一晚雪，今朝一覺瞓醒，一切又再reset，仲要剷雪。
點樣可以調整自己心情，令自己flexible啲，唔好俾呢個成日變既環境吞噬？我覺得當年一個電視廣告，提供咗一個好好既解答。
個廣告係咁既：
有一班小朋友諗住去踢波，點知踢波個日忽然落起傾盤大雨。其中一個四眼既小朋友失望地講：「打波先黎落雨。唔通連個天都唔鐘意我？」
佢身邊一個好正能量既小朋友，信心十足咁同佢講：「聽日一定會好天既。」
到咗第二日，果然風和日麗。兩個小朋友再度出現喺球場上。今次四眼小朋友好奇地問：「你點知今日會好天㗎？」
然後，正能量小朋友答咗個我希望兩姐弟會時刻記住、將來用黎克服變幻環境既一句說話：
「唔知㗎。希望在明天丫嘛」。