最近玩咗一樣只有加拿大有、第二度無得玩既野 – five-pin bowling 
。
Five-pin bowling，簡單啲講即係「冒險樂園碌波波認真版」。基本上你要用一個細好多、輕好多、無窿既保齡球去打5支樽，好似去冒險樂園玩小朋友碌波波咁，只係個場地係正式保齡球場。
我地閒日下午兩點幾去到five-pin保齡球場，租lane同租鞋。閒日既9am-5pm係happy hour，收費如下：
成人 
：7.49 CAD 每人每局 (non happy hour: 7.99)
小童 
：6.99 CAD 每人每局 (non happy hour: 7.49)
租鞋 
：3.99 CAD 每人
我地叫職員開咗圍欄等佢兩個啲波唔會落坑，不過弟弟當咗個欄係個game一部分，好似打枱波咁用個圍欄黎反彈個保齡球，竟然又work。
Five-pin bowling既規則大約如下：
平時10-pin係打兩球，five-pin就打三球
Five-pin果五支樽係唔同分數既，中間果支樽值5分、側邊兩支每支3分、最外側兩支每支2分，所以每一round如果打哂加埋就有15分。
全中同補中都好似10-pin咁會累計後面打中果啲樽既分數
一個perfect game既總分係450分。
點解好地地打開10支樽無啦啦要打5支呢？話說1909年，一個叫做Thomas Ryan既人喺多倫多開咗間保齡球場。然後喺呢間保齡球場，發生咗一個類似以下既對話。
顧客：「喂老細，你呢個保齡球都唔好玩既。」
Thomas Ryan：「點解呀？」
顧客：「個波又大又重！好鬼嘥力打呀。」
Thomas Ryan聽完個客既feedback，跟住做咗個實驗。佢將啲保齡球樽用車床cut到得返原本3/4咁大，然後將5支cut細咗既樽平均放喺條lane，跟住用一個大約3.5磅重、一手可以拎得哂既膠波去打呢5個樽。
結果呢個實驗，慢慢演變成今日既five-pin bowling。
講一講就cut咗原本10支樽一半。我心諗如果呢個顧客當日係同佢老細講「返工返八個鐘好鬼嘥力」會發生咩事呢？
因為兩姐弟上次喺Mexico all inclusive果時有打過保齡球，我問佢地到底10-pin定係5-pin bowling好玩啲。我諗住因為five-pin個保齡球輕啲、佢地易控制啲，應該會覺得five-pin好玩，點知兩個人都異口同聲地話覺得10-pin好啲。
因為雖然10-pin個波重好多，但反正佢地都係用圍欄唔怕落坑，而因為10-pin啲樽貼啲，打倒一支有機會推倒隔離果幾支，打起黎成功感大啲。相反打5-pin，因為啲樽疏，次次都打出個大分瓶，打打下佢地就覺得無乜癮。
我倒覺得5-pin bowling係幾啱細啲既小朋友 (say…細過8歲)，就係因為個波輕啲，至少佢可以感受到打保齡球既樂趣。
走果陣，我想講既然大家都prefer打10-pin，我估我地應該以後唔會再黎玩5-pin bowling吧。不過阿囡即刻提醒我：「你次次話下次唔再去食果間鋪頭，你跟住咪又帶返我地再去？」
都係既。Never say never。
雖然我對個game本身唔大興趣，不過我對個地板同圍欄就好有興趣：點解可以俾弟弟咁樣亂咁掟都唔爛既？如果屋企都有就好了…….
——
Bowling Depot
146-5255 McCall Way NE, Calgary, AB