小朋友spring break放假，一家大細出咗去食越南粉 (Pho)。
我地11:30am去到餐廳，餐廳當時唔算多人，所以隨意㨂咗一個卡位坐低。餐廳既燈光有啲昏暗，啡紅色既牆身加埋我面前既一幅中文對聯，令我覺得自己好似去咗一間老派中餐廳。我忍住咗冇叫弟弟同家姐讀對聯上既中文字，免得影響大家高漲既食慾。
打開menu，發覺呢間越南餐廳除咗越南野，仲有中式野 (e.g. 揚州炒飯)。不過望住牆上既中文字同埋聽到伙計姐姐背後講既廣東話後又覺得合情合理。
我今次叫咗一碗「特別牛肉河」，即係平時大家講既「火車頭」。呢碗火車頭啲料都幾豐富，有生熟牛肉、牛丸、牛筋、牛栢葉同埋牛腩。
講起牛腩，我記得初初黎到Calgary第一次去越南餐廳，睇menu見到有「brisket」 noodle soup，上網查字典係「牛腩」粉。我一心以為呢度既brisket會好似港式牛腩咁有少少肥、煙韌又好咬，點知碗野黎到先知原來呢度啲牛腩係切片，食落仲要有少少韌同「鞋」。自此之後，我就無再叫過越南牛腩粉。
今次呢碗火車頭既牛腩雖然都係切片，不過牛腩切得俾我之前食果間大條同厚身，食落有少少肥又唔韌，令我對切片牛腩重拾信心。
呢個故事對我既教訓：1. 唔好因為一間煮得唔好食就覺得果味菜式唔好食，2. 睇唔明menu上網search要用埋image search。
其實之所以知道呢間越南餐廳，係因為之前睇咗《住加男人》Youtube節目既介紹。我記得當時主持Wingo話碗火車頭無牛栢葉，令我有啲失望，因為我好鐘意食。唔知間鋪頭係咪睇咗個節目；今次碗火車頭個底度原來係有牛栢葉，雖然全部都係細細條，不過算係令原本無期望既我有啲驚喜。
總體黎講我覺得碗火車頭都算多料，特別係啲牛肉，我差唔多分一半俾弟弟我都仲夠食。如果小朋友好似弟弟咁食量唔大，基本上另外叫碗淨河粉再分啲料同湯俾佢就夠食，唔駛叫成碗佢食唔哂又嘥野。
雖然呢間餐廳既火車頭大件夾好食，不過我諗呢度真正出名既應該係沙爹牛肉河。因為我地坐得近廚房，見廚房推車仔出黎好多次都係沙爹牛肉河。可惜我唔係好食得辣所以無試。
移民後，每逢出街食野，一諗唔到食乜就會default去食越南粉，好似以前喺香港default去食米線咁。老婆鐘意食係一大主因，但同時亦因為呢度啲越南粉又真係幾好食。唔知道同呢度多越南人同埋亞省啲牛肉靚有無關係呢 ？(註：Calgary係屬於Alberta呢個省份，中文簡稱亞省。而亞省係盛產牛肉既省份，睇wiki話加拿大有一半牛係來自亞省)
大家移民後又有無一啲default會去食既野/餐廳？
住Calgary既朋友：有無越南餐廳推介呀？
—
Noodle King Vietnamese Restaurant
2323 32 Ave NE, Calgary, Alberta Canada
