AI，絕對係令抄功課進入另一個境界。
以前你想抄功課，你要識得一個可靠既同學再同佢做朋友，先有機會拎到一份「梳屎」(source)黎抄。拎到份source之後，仲要「努力」將份答案改頭換面一番。
但今時今日抄功課，襟個掣問AI就攪掂了，廿四小時任問唔嬲，仲要連粉飾份答案既effort都唔駛，因為用AI generate既答案次次都唔一樣。
阿囡(grade 7)同埋佢啲同學其實大部分都有用AI幫手做功課。阿囡班主任最近宣布， 佢會用AI checker去檢查佢地啲功課，防止佢地用AI抄襲。AI checker會掃描學生份答案，然後回報有幾多%既文字係用AI generate。班主任話如果超過5%，佢就會搵個學生傾計。
除咗用AI checker，班主任仲打算叫同學做多啲手寫既功課，等佢地無得直接抄AI俾既答案。
班主任：「為咗等你無得用AI直接抄答案，之後我俾既功課要用手寫。」
學生：「咁如果我用AI generate完再手抄返呢？」
班主任：「……你班友仔……」
讀大學果陣，教我地寫program既professor第一堂就話佢會捉我地抄功課。佢當時同我地講：「抄功課有分DC (direct copy) 同AC (advance copy)。DC，即係唔用腦照抄；AC，即係你會分析份source之後再用自己既方法去演繹份答案。我係會嚴打DC。」
Professor話佢捉DC既方法叫做「陽光測試」。佢聲稱自己會喺烈日當空下將我地啲assignment print出黎再叠起，如果完全叠得埋無字過底就即係兩份野係100%照抄。
聽落以為係講笑？佢話佢試過用呢個方法捉過一個學生。因為個學生懶到連個名都無改照抄。
到咗今日，就算AI可以generate每次都唔一樣既答案，都一樣有學生俾老師捉到DC。例如阿囡班主任話佢試過有一次檢查一個學生份功課，因為份功課係用Google Doc有version history，班主任見到第一個version係：「Sure, here’re the answers for [老師問果條問題]」，即刻就知道個學生用AI generate完個答案直接copy and paste。
我其實覺得用AI幫手做功課係無可厚非，甚至應該係一個為應付未來要掌握既技能。我真正驚既唔係小朋友用AI做功課會變蠢，而係驚佢好蠢咁用個AI做功課。
懶唔緊要。最緊要係懶得醒啲嘛。