我發現阿囡原來係有少少完美主義。
老婆最近同阿囡既班主任傾計，班主任盛讚阿囡既寫作能力好好，幾乎已經有高中程度。佢唯一既問題，係好多時會overthinking，花太多時間落一份習作上，結果令其他習作唔夠時間。
宜家阿囡初中都還好，但隨住阿囡升班，佢既workload會跟隨上升。如果佢keep住呢種慢工出細貨既速度，上到高中就會好大壓力。
我好明白，因為我寫blog都係咁。明明第一稿用大約30分鐘就寫完，但睇完又改改完又睇變咗兩個鐘，跟住越睇又越覺得唔好，最終直頭delete埋個post，白白嘥咗兩個鐘。
速度vs完成度，點平衡好呢？
呢個問題，其實IT界就最常見。你知宜家啲software幾複雜、要develop幾耐，好似chatGPT咁，如果你要佢齊哂功能先放出街俾人用，可能已經俾人淘汰咗。而且萬一個product係唔啱個market，你要過咗好耐先知道自己嘥緊錢同時間。
所以要平衡速度同完成度，IT界有一個叫做Minimal Viable Product (簡稱MVP)既概念。
MVP，即係指只有最初期、最核心功能既產品。例如我係Facebook，可能我既MVP淨係可以upload相同加朋友，但唔可以upload video、無group亦無fan page。任何其他功能，都可以喺MVP推出之後補加。
由推出MVP以至開發新增功能，通常都會有一個固定既開發週期，叫做sprint，例如兩星期一個sprint。產品經理會同開發人員討論到底呢個sprint度加啲乜落去，等所有人可以專注於一個sprint既工作內容。決定咗就無得加減。
套用MVP同sprint呢個概念落阿囡做功課：做習作前，先考慮份習作既「MVP」係乜野 – 篇野係要1000字就停？做20張slide就夠？規劃咗個範圍先開始做。
然後，參考sprint既原理，限定自己只可以花若干時間去做一件事，超過就放手。如果其他野做哂有時間先可以翻手再雕琢之前果份「MVP」。
我發覺MVP呢個精神，唔止阿囡做功課，或者仲可以apply落我既日常生活。
老細話我個Powerpoint唔知講乜？唔駛緊張。MVP黎㗎啫。
老婆話我吸完塵個地板都仲有少少污糟？一樣唔駛緊張。MVP黎㗎啫。
你…..覺得我呢個post 麻麻地？MVP黎㗎啫。照俾like得㗎喇。