我唔知到底係中年危機定係受移民影響，呢幾年我成日會喺度諗：移咗民之後既我到底有乜野目標？
移民後，我覺得自己既事業好難喺異地有突破。但我又唔想自己移民只係「為咗小朋友」、唔想自己黎到之後好似乜都無achieve過、無改變。況且移咗民，唔係反而應該做一啲喺香港無諗過achieve到既野嗎？
不過就咁諗咗幾年得個諗字，有目標但又唔太清晰、清晰既又實踐唔到。我，依然係喺香港既我，仲要肥咗。
早排睇咗一本叫做《一本書終結你的拖延症》既書。書入面講咗幾個確立同實踐目標既points，我覺得幾實用 ：
▋想改變人生，就需要「異想天開的目標」
點解要有「異想天開」既目標？因為作者覺得如果你個目標只係基於宜家自己能力範圍，例如「一年減一磅」，咁就算set咗做目標都唔會令你心動、唔會令你打開行動既開關、更唔會令你有所突破，結果只係原地踏步。
▋想要搵到異想天開既目標，就要了解自己既欲望
好了，咁就當我個目標係「一年減十磅」。夠清楚夠大喇啩？點解成日訂立咗個目標之後又實踐唔到呢？
作者覺得係因為無「欲望」。而無欲望既目標，唔係真正既目標。
「一年減十磅」不過係數字，但如果你既欲望係「瘦十磅就可以著到十年前果件靚衫」，咁呢團火就可以成為你維持實踐目標既動力。
▋想要持之以恆，就要關注行動目標而非結果目標
假設我地好清楚自己既欲望而設定咗個目標，不過如果過程中無乜實質成果，就會好容易令人想give up。
作者提議大家可以集中喺「行動目標」而非「結果目標」。
假設你設立既(結果)目標係「一年減十磅」。咁你既行動目標可能係「每日做二十分鐘運動」。就算你每日走去磅個重量無乜變化，你都會覺得自己正achieve緊一啲野。
—
咁我宜家有乜野目標呢？
我其中一個異想天開既目標，係想寫一本書，又或者開個Patron。我既「行動目標」，係一星期寫三篇文。所以係咪發現我近排出多咗post？
我既另一個異想天開既目標，其實真係想減肥一年減十磅，然後兩年後令自己fit到可以跑到半馬什至全馬。
我從未跑過半馬同全馬，只係十年前跑過10km。所以我暫時set咗我既「行動目標」為每日跑30分鐘步，再慢慢加上去。
阿囡見我喺度跑步，問我做乜野。我將我既減肥目標話俾佢知。
阿囡（冷淡）：「你上年都話減㗎喇。但轉個頭你又話食甜品。」
好一個掃興既小朋友……..