移咗民之後，每逢喺街、喺電視見到任何同香港有關既野，都會份外留神。我諗呢啲就係思鄉。
今晚難得一家大細坐定定睇咗一個叫《Amazing Race》既遊戲節目，正正係因為比賽場地係香港。
《Amazing Race》係一個美國既真人show（我記得香港有播）。參賽者兩人一組，大約有十幾組人環遊世界各地去挑戰唔同任務，每集最慢完成任務果組就會被淘汰。
通常每一集比賽既內容都同比賽城巿既歷史文化有關。今集黎到香港，參賽者第一個任務係「搶包山」。參賽者要搭船入長洲搶包山既場地，鬥快爬上包山塔頂攞吊喺上面既任務提示。雖然個包山無放到包上去，不過見啲參賽者都要出盡九牛二虎之力先過到關。
搶完包山，參加者拎到下一個任務既指示進入所謂「選擇任務」，喺兩個任務中㨂一個比較啱自己既去攻克。今集既「選擇任務」提示係Dance或者Sing。估唔估到係做乜野？你會點揀？
揀咗Dance既朋友，要去學舞獅 (lion dance)；㨂咗Sing既朋友，要去學唱粵曲。
先講挑戰舞獅既參賽者。難度當然唔會去到採青或者爬上爬落咁難，不過都考起唔少參賽者。而且負責評審既師傅無乜放水，所以好多組要試咗幾次先pass到。
不過最好笑既係學粵曲果班參賽者。佢地無論乜野人種，全部都要化哂粵劇妝、著成身粵劇服裝去學同表演。睇見兩個黑人查到成塊面白哂、唱住啲唔知講乜既廣東話，唔止作為觀眾既我地，連負責教同評審既專業粵劇表演者都笑到抽筋。
聽住佢地唔鹹唔淡、用英文拼音講出黎既廣東話，我又不禁諗起兩姐弟。忽然覺得有朝一日，佢兩個對住中國文化同傳統，或者就會好似呢班由美國黎既外國人對住粵曲同舞獅咁陌生。到底我地可以做啲咩，令我地既文化喺海外都得以保留？
我同阿囡講：「個黑人講廣東話可能同你差唔多喎。」
囡：「No that’s not true。」
睇下？佢成句都係用英文答我。
經過一番激戰，一如既往地有一組被淘汰，其餘參加者move on去下一站：大阪。講到思鄉….唔知幾時又可以再返日本呢個鄉下呢。
我覺得今集香港站啲任務都㨂得幾好。難度適中之餘，亦幾表現到香港本地文化。雖然如果俾我去設計任務，我會設計一啲更貼地既項目。
例如：
喺繁忙時間(返或放工)喺金鐘站鬥快迫上地鐵。
喺交更時間鬥快截的士過海。
又或者….喺澳牛食野鬥坐得耐。