有無覺得你個小朋友成日喺度攪攪震？我有。
弟弟喺香港讀PN果陣就開始令我有呢個感覺。佢返學果時會行來行去，有時會攪下個同學，又或者走去刷咗老師寫喺白板啲野。
到K1果陣，有一次帶佢去參加啲足球訓練營。教練叫佢地帶住個足球扭雪糕筒，結果佢係一路行，一路用腳踢跌啲雪糕筒，然後再用手掟咗個波出界，睇到個教練呆咗。
除咗返學或者上堂學野呢啲所謂既正經野之外，弟弟連玩既時候都會攪攪震。
因為弟弟鐘意《三國演義》呢個故仔，我於是搵咗個電腦版既《三國志》遊戲同佢玩，諗住佢可以邊玩邊學中文。起初弟弟都玩得好正常，但玩玩下我發現佢開始研究一樣野： 點樣可以將君主個位，傳比一個完全random既角色什至敵對勢力 (e.g. 例如劉備傳位俾曹操)。明明個game既目的係一統天下，但佢忽然走去鑽研點樣敗家。
以為文字game玩到佢悶所以攪攪震？NO。我地就算喺Switch度一齊玩《FIFA 25》既踢波遊戲，弟弟打打下，都會忽然想盡辦法去擺烏龍射自己龍門，又或者瘋狂咁剷人等自己啲球員俾人趕出場。
明明做做下一樣野，但弟弟總係會忽然忘記咗果件事個目標係乜野，然後分咗心去做啲同件事完全無關既野。
有一次，弟弟好proud咁show咗一個佢整既Google Slides (即online Powerpoint)俾我睇。我開頭見啲slide無內容有啲奇怪，但我發現我部電腦開始變得好慢。然後當我睇到個slide number果陣，我同當日果個足球教練一樣「傻了眼」：個Google Slides有2000幾3000張slides。
弟弟同我講：「我好想知Google Slides好多Slide會點。」
我終於明白弟弟其實唔係想搗亂。弟弟只係單純地、有好好好強既好奇心。
佢只係……
好好奇唔踢個波但踢跌咗啲雪糕筒會係點。
好好奇到底《三國志》劉備將個皇位俾咗個陌生人會係點。
好好奇到底《FIFA25》如果有好多人俾人趕出場會係點。
好好奇如果Google Slides超過咗3000張Slide會點。
我忽然間覺得，雖然弟弟個形式怪啲，但有好奇心係好事。我地唔係成日都話想小朋友學習果時有好奇心嗎？
不過有好奇「心」唔緊要，你唔好有好奇「手」得唔得。
因為佢既好奇心，同親佢出街，佢隻手成日忍唔住周圍攪，令老婆同我既神經好緊張。
記得喺香港果陣，我同個同事去咗SOGO一間專賣玻璃杯同水晶既鋪頭， 諗住買個酒杯送俾我地就黎結婚既老細。望住成間鋪頭鋪天蓋地既玻璃同水晶，同事當時不懷好意、陰陰嘴笑地同我講：「喂，下次帶埋你個仔黎睇丫」。
我當時真係即時心頭一緊。什至到宜家一幻想帶弟弟去果間鋪，我個胃都會「毑」住。
宜家出街，我成日都好似打籃球人盯人咁痴住弟弟，擔心佢又亂咁攪人地啲野。唯一令我最放心就係同佢去睇毛公仔。因為我知道佢無論點掟，個毛公仔應該都唔會爛。
不過，如果佢開始研究點摵開個公仔的話……
大家又有無一位好奇心旺盛既小朋友呀？你又點控制…佢隻好奇手？