公司除咗越來越忙，返工既policy亦有所改變，由完全WFH (work from home) 改為強制返公司三日。
公司發出電郵通知，email subject寫住「RTO arrangement」，我攪咗好耐先知道RTO係解「Return to Office」。我諗難聽既說話，用short form講出黎係舒服好多。
除非我搬去多倫多，否則無可能返到公司。好彩公司有豁免機制，只要証明你屋企同公司有超過90分鐘車程就可以申請，所以我呢類外省員工依然係fully remote。
公司宣布一出，住喺多倫多住既同事當然好抗拒。高層既解釋不外乎係認為喺office會令同事間既溝通同合作更有效；但唔想返office既同事就唔多認同，因為個個返到office都只係喺自己個位度dial in返個online meeting，同喺屋企做其實無乜分別。
當然，大家心裏明白：高層想大家返公司，除咗想大家易啲溝通，同時都係想大家productive啲，畢竟你喺屋企都唔知你攪乜；但大家唔想返公司，因為無啦啦要多咗時間搭車揸車，特別係唔係住喺down town既同事，講親要返office既唔方便都真係一字一淚，而且因為COVID後大家習慣咗既一啲家庭routine又要忽然改變 (e.g. 接送小朋友返放學)。
我諗debate「返工應否返office」，有少少似debate「中學生應否談戀愛」一樣。贊成與否，都係睇下你係咪談緊戀愛㗎啫。
同事都覺得住喺Calgary既我立即變成贏家，因為一來唔駛返office，二來仲要住屋平過多倫多一大截。雖然當我同佢地講佢地其實可以搬過黎，大家都耍手擰頭：「咁凍，頂唔順呀」。
唔知道我呢個外省員工work from home既安排可以維持幾耐呢。如果最終公司完全取消外省員工既WFH要我relocate，咁就真係WTF。
果然，難聽既說話，用short form講係舒服好多。