我覺得對比自己喺香港同加拿大睇戲既經驗，都反映到兩地生活既差別。
▋方便度
我以前係住將軍澳既，樓下就係商場。每次睇戲，踢住對拖行落樓就得。無論任何天氣，就算狂風暴雨，我一樣遮都唔駛，施施然落樓。
相反喺加拿大，出入一定點都要揸車。有時懶唔想出去，又或者遇上天氣差少少，好凍或者落大雪，基本上就會打消出去睇戲既念頭。
所以對我黎講，喺香港睇戲係方便過加拿大好多。
▋舒適度
喺香港，我同老婆都要返工，通常我地睇戲都係揀夜晚。不過場戲無論係幾點，戲院都總係坐滿歡眾。所以我地通常都預早買飛，而且因為將軍澳個院好細，我地一定係買最後果行。
相反喺加拿大，我唔知係咪因為我地宜家多數睇下晝，我未試過睇一場戲個院係滿既。好似今日咁，我幾乎係包場，差不到多套戲開始先有一pair人黎join。
我地通常會去Cineplex既戲院睇戲。個院好大，所以我地唔會買最後果行，因為太遠。戲院啲位亦好闊，我估因為外國人大份啲？每個位都係recliner seat，可以較低同埋「long」對腳上去，幾乎好似屋企瞓喺梳化睇電視咁舒服。
論舒服，我會覺得喺加拿大睇戲舒服好多。
▋溫度
地球上除咗加拿大呢個地方外，仲有一個地方係好凍既。
係香港既戲院。
同香港同加拿大既氣溫相反，香港既戲院比加拿大凍得多。咁當然，亦因為室外既溫度差距大，加拿大室外要凍得多。所以喺香港，我一入戲院就要著褸；宜家喺加拿大，未坐低就除褸了。
▋語言
喺香港睇戲有字幕，但黎到加拿睇戲乜字幕就無。講真，喺度睇英文戲係辛苦咗，因為要好集中精神先聽到，基本上難聽過平時返工聽果啲英文好多。
宜家好多時睇完套戲，返到屋企會再上網睇下個plot，先明白返自己錯過咗既細節。
不過，倒不是套套戲都無字幕既。幾時有？中文戲係有字幕既。仲要有英文字幕tim （唔該哂）。
我覺得我喺兩地睇戲既經驗，正正同喺兩地生活一樣，各有好壞，而且所謂好壞亦相當個人：有人鐘意方便、有人鐘意舒服夠空間、有人怕凍、有人怕語言障礙。
我諗有時人類既痛苦，或者源自強求一樣野變成另一樣野：好似強求加拿大啲戲全部出中文字幕，又或者…強求香港啲戲院，校細啲個冷氣吧。