我未黎加拿大之前，曾經天真地以為喺加拿大係無人會OT既。
外父好多年前移民加拿大，初初黎到喺一間組裝電腦既公司做，有幾個下屬幫手砌機。佢同我講有一次，其中一個下屬仲差一粒螺絲就裝完部機，但竟然因為夠鐘就丟低粒螺絲收工。
呢個故事，成為咗我對加拿大職場既印象。但宜家自己喺加拿大做咗幾年野，發現個職場並唔係咁樣。
我發現其實大家都會OT，特別係年輕同事，全部都好上心、好肯做、遇上趕deadline係唔會托手肘。我什至聽過啲後生同事同老細講：「放心，我星期日會攪埋果少少佢」，攪到我以為自己返咗香港。
公司踏入2025年多咗好多project，但上年年尾又炒咗啲人，結果d workload就好似奬門人啲辣辣壽司一樣：「邊個食？你要食！」，仲要係硬食。
早排其中一個project趕住出街，老細要我地一齊趕起佢。你估下老細會點叫大家一齊追deadline呢？
用硬既：「我唔理，你同我死掂佢」？NO。好唔Canadian喎。
用軟既：「兄弟，幫幫手拍爛檔攪掂佢」？NO。
佢係同我地講：「請你地預留足夠時間俾個project，我嘗試避免要大家weekend都做野。」
「我嘗試避免要大家weekend都做野」 – 言下之意，即係如果你唔想weekend要OT，咁你平日「預留足夠時間」- 即係OT，攪掂佢啦。
你睇下，講得幾含蓄。
我記得上年年頭加入新公司果時見同事多野做舉手話幫佢，老細當時係同我講：「唔係你既role，唔駛幫佢手。等佢自己慢慢攪，唔好攪到自己OT。」估唔到時隔一年，「唔好攪到自己OT」變成「嘗試避免要大家weekend都做野」。
我唔知呢啲算唔算「有咁耐風流，有咁耐折墜」。不過短時間內，恐怕真係要做一陣葉師傅，就算唔一個打十個都至少要打兩、三個。因為我發現，當日我舉手話幫佢果個人，已經俾人炒咗。呢鑊都算係「求仁得仁」。
加油吧，各位Canadian。