呢度有兩張香港夜景圖：一張係我上啲stock photo website搵既，一張係用AI整既。你知唔知邊張係AI圖？
今日阿囡既班主任就同佢地成班做咗同樣既exercise。老師準備咗好多張真相同AI圖，然後叫學生估邊張係AI整既。阿囡話結果佢地大部分人都只係答啱到一半。
我一直都知道「有圖有真相」並非必然。我廿年前入行既時候係幫人寫website既，當時公司接咗好多酒店客。有一日行過designer同事個位，見到佢喺度幫個客間酒店「鋪草皮」- 原來個客話間酒店前面塊泥地好肉酸，叫我同事用photoshop幫佢鋪返啲草上去。
廿年前身為專業designer既同事去執呢張相，應該都執半日吧。宜家有AI，可能叫個小朋友都做到，仲要五分鐘就攪掂。
人類，已經進入咗連講大話都可以自動化同可以搵電腦代勞既階段。
講真，我係真心驚。
黎咗加拿大之後，發現呢度好多騙案，比香港更多。成日都收到啲奇怪電郵同電話，攪到個人疑神疑鬼。好彩我呢度真係識好少人，所以一見個caller ID或者個email sender唔識，就索性唔聽唔覆。
事實上，根據Statistics Canada既統計，過去十年加拿大既詐騙案由2012年既79,000宗上升到2022年既150,000宗，差不多多咗一倍。其中AI明顯係催化劑。
例如上年年尾就有一單新聞：騙徒用AI整咗兩條片，分別係加拿大總理杜魯多同埋Tesla老闆馬斯克推介一個虛擬貨幣平台。如果你睇咗條片心諗正喎，跟住襟咗片入面條link又寫埋你個電話落個網頁度，「專家」就會即時打俾你，然後叫你去download一個software，跟手入侵你部手機再攞埋你銀行資料。
呢單騙案最終有十五個人中招（可能更多），涉及金額差不多二百萬加紙。
係，我知你個心諗緊乜野。點解次次俾人呃果啲人都咁有錢既？
宜家啲AI都已經咁勁，到我老咗仲得了既？我諗如果有人用AI扮我個仔把聲打俾我叫我過錢俾佢，我一定會中招。
我覺得每個家庭都可能要set返一個暗號。你出上句、對方要答返下句，好似「萬里長城萬里長 、齊心合力建家鄉」果種。萬一有咩事，可以用黎快速對証到底係真人定AI。
不過諗深一層，或者我呢一類人，其實對呢啲騙案黎講係最安全了。
