星期六，我地落咗Calgary downtown一間最近開、全國都有franchise既米線，試下同香港有乜唔同。
我未到5點黎到已有8成滿既餐廳。我地喺唯一剩低既卡位坐低，卡位後既牆上大大隻字寫住「No MSG added」(無添加味精)。家姐問咩係MSG，弟弟快我一步解釋：「MSG係Monosodium glutamate」。家姐聽完呆咗。
我地掃描枱角QR code翻閱menu。我好怕食辣，少少都唔掂，但menu上竟然有佢聲稱「期間限定」既胡椒豬肚雞湯底，隔離mark咗一隻辣椒。我又怕食唔到，但又唔甘心食個普通蕃茄味或者原味。「期間限定」喎，你唔係執輸下話香港人？於是老婆落單時喺胡椒豬肚湯度寫咗少辣。
十分鐘後，服務員捧住一塊木板，上面放咗一個pot，pot入面係正沸騰既胡椒豬肚雞湯。
我發覺menu上張相同現實個賣相係好大差距。不過唔緊要，我Facebook張profile pic又何嘗唔係。最緊要係真材實料。
我用筷子攪拌，發現啲雞唔少，但斬到好碎好細舊。豬肚就有好多。我趁熱飲咗淡湯，可能因為叫咗少辣所以我都頂得住，不過我覺得辣啲個味應該會好啲。果然，唔抱住決心食辣野係無乜前途。
我幾鐘意佢用個pot上呢個設計。因為出面好大風我咁啱覺得凍，食住有少少胡椒辣味、又熱騰騰既胡椒豬肚湯特別暖胃。其實Calgary咁凍，我估呢度就算生日蛋糕用煲上我都會無任歡迎。
家姐同老婆分別叫咗原味同椰香咖哩味過橋米線。服務員捧咗個煲仔過黎之後，仲有十二款配菜：豬肉卷、魚豆腐、木耳、香腸…等等。老婆佢地好似打邊爐咁將啲配料倒哂落個煲仔度，再加埋米線落去食。
我地仲叫咗鹽酥雞做小食。比起之前喺Calgary另一間台灣野既鹽酥雞，呢度既更脆、亦唔會食到成口粉。不過鹽酥雞唔係台灣野黎㗎咩？點解雲南野又有得食？不過喺加拿大，乜野fusion我都見怪不怪。
我差不多成煲湯飲哂，但卻無覺得太口渴。我諗no MSG added可能所言不虛。呢度另一個特色係米線可以無限添加，不過我食咗兩碗都已經夠飽了。
雖然同「回憶中的味道」如《譚仔》、《譚仔三哥》或《米線陣》有好大分別，不過我唔介意。沒有了回憶的味道，再去創造新既回憶就好了。雖然我承認，我係有少少懷念喺《譚仔》將墨丸講成「勿演」既阿姐。
弟弟食完，問我地會唔會再黎，通常佢咁問即係代表佢鐘意食。醒目既老婆買咗membership所以有折；而原本member生日當日送一碗免費，雖然老婆上星期生日，餐廳結果都送埋呢碗免費米線俾我地，皆大歡喜。
PS：加拿大既朋友，唔知大家有無食過呢間米線？大家又覺得如何？
云尚米線
111 2 Ave SE
Calgary, AB T2G 0B2