喺外國教小朋友中文，係既嘔血又有趣。
嘔血，當然係因為佢地錯漏百出；但有趣，卻又因為佢地通常錯得好好笑。我發覺其實兩姐弟既中文錯誤，唔係random而係有系統既：
▌ 1：讀咗「隔離」個字
呢個係最最最常出現既錯誤。例如「病毒」個「病」字讀咗做個「毒」字。
所以「你有病」會變咗「你有毒」。雖則從醫學角度，呢句野又錯唔哂。
▌ 2：將形似字混淆
有時啲字好形似、只爭一兩劃、或者只係同部首，阿囡都會攪亂。
例如阿囡去到茶樓，會將「鳳爪」讀做「鳳瓜」、「蝦餃」讀做「蝦飯」。
所以，「灌湯餃」會變成「灌湯飯」。聽落…好似大碟抵食咗？
▌ 3：將同字詞語代替
因為識既詞彙少，所以一唔識果陣就用佢聽過既同字詞語黎交換。
例如「牛坑腩」，阿囡讀成「牛坑渠」。因為一講到坑字，佢淨係知道坑渠。
還好，佢讀完都覺得有啲唔對路。
▌ 4：將同音字混淆
例如「打稅」同「打碎」。
所以當我地話加拿大買親野都要打稅，弟弟唔開心咗好耐。
▌ 5：將同義字交換使用
以為同義字可以互通使用。
例如豬八戒，阿囡讀成豬八「切」。因為佢話反正「切」同「𠝹」，英文都係cut之嘛。
▌ 6：以聯想創作詞語
因為唔知道某樣野中文點講，所以嘗試以邏輯去聯想一個詞語。
例如阿囡如果想食薯片，佢會同我講：可唔可以食「鹹品」？
因為甜既snack = 甜品。咁鹹既snack仲唔係鹹品？
▌ 7：將中文字同其他文字或符號混淆
我都唔知呢個係咪呢個時代先會有既問題，畢竟小朋友見emoji多過見文字。
例如「出口」，弟弟會讀成「出square」(個口字好似正方形)。
又例如「井底之蛙」，弟弟會叫做「hash tag底之蛙」。
老婆叫我教返佢地啲中文，我好猶豫。因為我估我未教完就已經一係激死，一係笑死。
唔知你地既小朋友又中咗呢個list幾多款？
歡迎留言分享。