有無覺得去咗外國生活，啲人做野好慢？
我係某software既專家。公司請我係因為要我用呢個software去做一啲野。但我當日返工頭一個星期都攞唔到個software既access，結果日日數手指 (雖則我完全唔介意）。
果一刻我就明白喺加拿大做野，係急都急唔黎。
我覺得其中一個慢既原因，係因為呢度做野分工分得好仔細。
最近要幫個vendor申請一個software既access，咁啱負責既同事要放一個月假，於是交咗俾我幫佢跟。同事臨別前交低左一個IT同事既名俾我，然後意味深長地同我講咗句：「good luck」。
我根據指示搵到呢位IT同事。經過兩三日喺online chat, email同埋online meeting既來來回回，呢位IT同事最終同我講：「呢part唔係我負責，你可能要問另一個同事。」
如是者我就好似打RPG game咁，每次走去問一個人，果個人會俾少少線索我，然後叫我去問另一個人。因為分工分得好細，每個人只係知道一個大問題既一小部分，無人可以俾到一個完整答案。
而令呢件事更複雜化，係因為globalization加上remote working culture。公司將唔同部門分拆去唔同地區，所以要集齊一個問題既拼圖，我就要由Calgary開始，先問多倫多同事，多倫多同事再問巴西同事，然後巴西同事又走去搵喺以色列同事，然後又再問印度vendor….攪完一輪，先發現其實要先問喺多倫多既security team。
而又因為同事分散喺唔同地方有timezone difference，令到成個communication更慢。有時唔小心講少咗樣野，又要等多一日。
最終同事放完假返到黎，雖然已經involve咗6個分散世界各地既同事，但現實係單野毫無寸進。
覺得外國啲人做野慢，可能係因為我地慣咗一步到位，慣咗每個人都知道哂所有野，慣咗每個職場人都可以「一個打十個」。呢單野或者應該怪責下甄子丹。
加拿大係唔會出到一個葉問。因為如果遇到要打十個，加拿大既Ip Man應該會好有禮貌咁同你講：
「Sorry, let me get some help first. Please wait」。
然後，你發現Ip Man帶咗20個人黎。因為有一半join咗工會，黎到可能會罷工。