喺一片漆黑、無乜星星既夜空之下，四野無人，只有一片寂靜。舉頭向上望，眼前雄偉既金字塔泛出少少微弱既燈光，令現場既氣氛多咗一重詭異。
我地一家四口，企咗喺埃及最大既吉薩金字塔 (Pyramid of Giza) 面前。
帶領我地夜遊金字塔既導遊係一個叫做Mona既白人女仔。佢紮起條金色馬尾，戴住一個大眼鏡，睇起黎有少少冒失。
我地跟住Mona沿住燈光進入金字塔內。忽然，Mona好似被人點咗穴咁一動不動。我舉起右手，耳邊立即傳黎一把聲音：「先生，有乜野可以幫到你？」
工作人員幫我將出現故障既VR headset除低。眼前係一間好大既房間，入面有好多分成唔同群組既人戴上VR (virtual reality) headset左顧右盼，有部分人仲不時伸手去摸空氣。
係，我其實無去到埃及。我地只係去咗一個叫做既《Horizon of Khufu – Journey in Ancient Egypt》既VR展。
參加者進入VR環境後，喺虛擬導遊Mona既帶領下，有大約四十五分鐘時間由外到內、由低至高、由遠到近參觀古埃及金字塔，再近距離體驗木乃伊既製作過程。
有少少大鄉里既我，覺得呢個VR展帶俾我好大震撼。因為就算我真係個人去到埃及金字塔現場，我都無可能好似呢個virtual tour咁飛上金字塔塔頂遠眺埃及風光、無可能一路參觀一路有visual clue highlight導遊介紹緊既事物、更無可能可以「包場式」參觀世界七大奇蹟之一 (因為入咗VR場景，你就幾乎睇唔到其他人）。
而VR可以穿越既唔止空間，仲有現實中無可能穿越既時間。我可以輕鬆穿越幾千年既時光，好似現場一樣同古埃及人一齊出席法老王既喪禮。
工作人員攪左五分鐘，終於換咗個新既VR headset俾我，等我即刻join返已經喺虛擬金字塔入面走咗好遠既老婆仔女。呢個virtual tour有一個我覺得幾得意既功能，就係同你一齊黎既同伴會喺虛擬世界入面化身成一個avator，上面會寫住佢個名，所以唔驚同佢地走失，亦令呢個本來好個人既體驗變得無咁孤獨。
四十五分鐘虛擬世界既時間一瞬間過去，令我覺得有少少意猶未盡。不過兩姐弟同老婆都話睇完有少少暈，所以我諗呢個tour既長度，應該差不多喺我地呢類唔係成日使用VR既人既感觀可以承受既極限吧。
我問阿囡如果俾佢揀，佢會想去現場定好似今次咁喺VR參觀金字塔，佢諗都唔駛諗就答我梗係用VR：又安全、又唔駛travel咁遠去現場睇，再加埋我以上講既優點，何樂而不為？
以前成日聽啲大人話：「讀萬卷書不如行萬里路。」去到科技發達既今天，或者唔一定要行萬里路，你需要既可能只係穩定既網路，你就可以喺虛擬世界中任意馳騁。幻想下如果VR加埋AI – 你可以喺虛擬世界入面跟住AI老師，任意探索任何科目既任何命題。呢個聽落好似有少少天方夜譚什至有少少恐怖，但我覺得可能到咗我個孫果一代，呢種學習分分鐘會係常態。
我又問阿囡佢覺得呢個技術仲可以apply落咩學習上面。阿囡話如果可以apply落天文學應該會好有用，因為咁樣咪唔駛上太空都可以暢遊各種天體囉？
我就覺得如果佢apply落去漫遊古代中國既宮廷生活，應該都會好有趣。
特別係深入探討後宮佳麗三千果part……