有無覺得小朋友越大，越難同佢溝通？
黎到加拿大之後，有時覺得自己唔係好識喺呢個唔同既文化下同小朋友溝通。特別係阿囡越來越大、越來越有自己想法，唔會好似細個咁無論我地講乜都會照單全收。
偶然喺圖書館發現咗一本叫做《What do you say? How to talk with kids to build motivation, stress tolerance and a happy home》既育兒書，我覺得有兩點對我幾大啟發、同時亦好practical：
▋先處理感受再講道理
每當小朋友出現問題果陣，我總係覺得自己「一定要做點什麼」去「教」返好佢，即時捉住佢同佢講道理。不過其實每次話佢地、lecture佢地既時候，我都覺得佢地或者隻耳有聽，但個心肯定無聽。
作者認為家長如果能夠先了解同幫個小朋友確認自己既感受，令小朋友覺得自己被明白，跟住先同佢講道理，個小朋友會容易啲聽得入耳。
例如小朋友考試考得差，instead of一黎就一句KO佢：「都叫咗你早啲溫書㗎啦」，可以試下反過黎同佢講：「你會唔會覺得唔好受？因為我知道你都想考得好啲既」，跟住先同佢傾： 「咁你如果想下次想考好啲，你覺得有乜野可以做？」
Don’t judge, listen and connect first。
▋以「顧問」角度同小朋友溝通
其實有時唔止小朋友，大人之間傾計講煩惱，好多時都唔係想人地教佢點做，可能只係純粹想呻吓，或者想將自己既想法講出黎而已。
我相信如果你有試過陪過一個失戀既朋友（又或者係你自己失戀搵人陪），應該會明白。
作為家長，我地好多時都會好想俾小朋友意見、「教」小朋友點做。作者提議家長可以當自己係一個顧問 (consultant)。Consultant既特點，就係唔駛亦唔會話俾個客人知個答案係乜。Consultant會透過發問，幫個客人自己一步一步咁搵出自己既答案。同小朋友討論果陣，我地同樣可以用問題去引導小朋友思考。
作者仲有一個tips：如果你真係有意見想分享，不妨喺你俾意見之前，詢問一下小朋友想唔想聽。如果佢唔想就不必勉強，因為反正你講咗佢都唔會有心機聽。
我鐘意呢本書既原因係因為佢好多example，唔係太多理論。作者通常每一個chapter都會有一部分寫DOs and DONTs – 即係有乜野說話最好避免、同埋有乜句子可以代替。
例如我地成日會講既「叫咗你唔好咁做㗎啦」（you shouldn’t have done that)，作者提議可以用「我好開心你趁呢個機會又學識咗一樣野」(I am glad you learned from that) 代替。
我特別鐘意佢每一個chapter都有一個類似家長來信既section：唔同家長post好多好真實、關於佢地子女既問題，作者然後提議個家長可以點處埋。
我某程度上覺得呢本算係我睇過最實用既育兒書了。
囡：「做乜你會睇呢啲書既？」
我：「因為我唔識，咁唔識咪睇囉。」
囡（疑惑的笑）：「吓？你唔識同我講野咩？」
我：「唔係唔識同你講野，係唔識點樣有效地將我既想法傳俾你。」
囡（專家口吻）：「係咩？你同我講野都算decent既。」
我聽到都幾開心。因為喺阿囡既字典入面，「decent」已經算係一種讚美了。