儘管攞到加拿大公民身份，我總覺得自己依然係好唔Canadian。因為喺我心目中，所有Canadian都係識滑雪既，但我唔識。
我自細都好怕啲速度高既野。喺我心目中，快即危險。基於呢種恐懼，我黎咗加拿大幾年都無去學滑雪。今次終於下定決心去學，因為畢竟呢度冬天唔滑雪都無乜好做呀。再者老婆本身識滑，阿囡學校又有帶佢地去學，估計弟弟大啲都會學吧。咁到時咪淨係得我唔識？
我同弟弟喺Calgary既Canada Olympic Park (簡稱COP) 報咗一個兩個鐘既私人滑雪堂。呢個距離屋企只有約二十幾分鐘車程既滑雪場，曾經係1988年冬季奧運會既比賽場地。遠遠望去，已經可以見到一個好似機場控制塔既高塔，入面延伸出一條又長又斜、用黎做ski jumping (跳台滑雪) 既滑梯。
我地朝早十點幾去到滑雪場，停車場已經泊滿哂車 ，剛到既車要喺停車場度不斷徘徊等位，感覺好似去咗星期日朝早既Costco。好彩咁啱有個人要走，我地先有位泊車，唔係唔知要等幾耐。
行入滑雪場既主building，見到趁今日好天黎滑雪既人喺入口既走廊上熙來攘往。有啲應該係好似我咁既初學者，一家大細兩手空空地走去rental；亦有成身裝備、望上去好似身經百戰既滑雪客，走去登山纜車既入口。
老婆帶住我同弟弟行去rental度借滑雪用品，首先去攞滑雪boot。一拎上手，發覺原來對boot係好重，仲要好硬。我套咗第一隻腳落去，覺得小腿俾個boot夾住好唔舒服，但我又睇唔到佢有得調校。老婆話我過一陣就會慣，我有少少半信半疑。
我同弟弟著住又重又唔舒服既滑雪boot，步履蹣跚地行到去拎ski既section。負責攞ski既年青人問我同弟弟著幾多號boot、幾重同幾高，然後叫我地企埋一個位度高，跟手就走去佢身後一排排掛住ski既架度攞咗一對ski俾我地。
我拎住對ski，發覺仲重過對boot。我心諗加埋個ski落對boot，我同弟弟仲提唔提得起隻腳呢？不過既然係「滑」雪，唔係「行」雪，段估唔駛點提起隻腳行掛？
攞埋頭盔同滑雪杆，我地離開rental行去滑雪場地。雖然著住滑雪boot行路好唔舒服，不過喺雪地又應該無位俾我放低原本對鞋，所以都無辦法。我覺得自己好似著住高踭鞋行路咁，一路行，我一路對著高踭鞋仲可以健步如飛既女士感到敬佩。
去到滑雪場地，我其實已經feel到自己行到一身汗。今日係零下大約幾度，老實講算暖了。我有少少後悔著得太多衫。
滑雪場地入口企滿哂人，特別係好多小朋友。我估計好少我呢啲咁大年紀既初哥吧。入口不遠處有一張長枱，幾個同款藍色䄛既人攞住啲紙筆喺度準備，我諗應該係教練同工作人員。
老婆見我地仲早，就教我同弟弟點樣著同點樣除個ski。著ski其實唔難，但一著上對ski之後，我發現自己變得寸步難移。因為每當自己想向前行一步，腳底下既ski就順勢向後滑。
我就咁喺原地嘗試滑行咗幾分鐘。當身邊果啲小朋友不斷喺我身邊穿梭，我卻無論點郁都無法前進。越想用力向前，就滑得越後，結果好似上咗跑步機咁行極都係喺同一位置。如果王澤先生 (漫畫《老夫子》既作者) 見到我呢個畫面將佢畫成漫畫，我估佢既標題一定係《原地踏步》。
正當我僵在原地不得要領，一位女教練向我同弟弟行近。教練係一位睇落去我諗有五十歲既白人女士 ，金髮僅僅及肩，下巴好長。令我有啲在意係佢紋咗兩條黑色既眉，同佢果一頭金髮拍埋竟然無乜違和感。
教練問：「兩位好！我係你地今日既滑雪教練。你地今日有乜野目標？」
我發覺呢度學乜都好，啲教練都好鐘意問呢個問題。之前帶弟弟去學游水，個教練姐姐又係咁問。
我就梗係想我同弟弟今日就學識滑雪，以後唔駛再俾錢你洗啦教練。不過我對學滑雪呢件事無乜概念：到底係好似學踩單車咁，忽然間有一下click中咗就會識？定係好似學揸車咁，要分好多堂先會做到？再者，點為之「識滑雪」？可以喺座山度滑落黎先叫識？定係喺個斜路仔落到就算識？
我答教練：「我既目標係同弟弟今日學識哂所有滑雪既基本動作，等我地可以開始自己一家大細去滑雪。」
教練笑一笑，然後答：「好！一於係咁話。我地開始吧。」
我諗呢啲就係所謂既expectation management吧。唔通你話想今日之後就可以參加奧運個教練又話好咩。
不過阿教練，你可唔可以先教我點樣可以著住ski喺個雪地度行？
我喺同一個spot行咗十分鐘了。
(待續)