順利過咗第1 round HR面試，第2 round要見兩位來自我想加入果個部門既director，包括hiring manager（即如成功的話，我的未來老細）。
Zoom開始，首先見到一個滿頭蓬鬆金髮、面方方、戴金絲眼鏡、著住件Tee既男人。佢開口自我介紹，發現原來佢就係個hiring manager。從佢一身散發既感覺，直覺話俾我知：呢條友係啱啱瞓醒。不過佢既眼神清晰而直接，令人不期然提起警戒。
另一位interviewer online了：一個光頭、成面鬍鬚，年紀睇落大少少既男人出現了。佢個樣令我諗起ironman第一集Tony Starks個壞蛋business partner，睇落有啲……奸。從佢個畫面既角度，佢本人應該好高，而且我覺得……佢係咪企咗係部跑步機度同我講野？
同HR面試果次一樣，今次面試都係由自我介紹開始。聽到我來自香港而且唔係黎咗加拿大好耐，兩個人都有啲意外，明顯公司無來自香港既員工。兩個人跟住輪流問我關於project、對客同埋team management既經驗。
奸樣director：「你會點樣去manage一條team? 」
我好想答佢：「無為而治」囉。有咗小朋友之後發覺，下下都要「管」住先「理」你既話，即係一唔睇住就亂黎啦。
我將我既想法大約講咗出黎，hiring manager聽到呢度，忽然開口問：「咁你比較鐘意deliver，定係manage team? 」
講真，呢個role有team management既成份，答佢後者先係正路答案。如果喺香港，我應該已經答咗佢後者了，因為咁先符合「向上爬」既基本原則。
但呢個係咪真係我想要既野呢？反正都係fresh start，我決定忠於自己，講一次真心話：「我唔介意做team management，但我比較喜歡做delivery。」
Hiring manager微笑點頭，彷佛佢一早已經睇穿我會揀呢個答案。忽然間覺得佢原本好似啱啱瞓醒果個樣徹底消失咗。
奸樣director接著再問：「你諗住未來呢幾年點？」
點解啲外國人咁鐘意問人呢條問題呢？腦裏面忽然響起LMF果首大懶堂：「想我都好想好似中咗頭奬，有野唔駛做，老細又吹我唔脹……」。我照樣搬返上次果個門面答案出黎，hiring manager不太滿意，跟手再問一句：「咁你想喺呢間公司度得到啲乜野？」
錢囉。你唔係想我幾廿歲人答「友情」咁熱血下嘛。不過「面試時，有時不能講心果句」，我唯有好簡單咁答佢：「我呢一刻只係想落地去攞啲經驗。我最期待既就以可以與有趣的人做有趣的事 (work with cool people on cool things)；其餘既野我無想得太多。」。Hiring manager定咗一下，可能對我既答案有啲意外，又或者佢係諗緊：「你當返黎玩呀？」。
傾咗個幾鐘，終於去到面試尾聲。Hiring manager最後傾閒計咁問咗我一句：「你啱啱黎到加拿大，有習慣加拿大既冬天嗎？」
我求其答佢「OK呀！無問題呀。」
Hiring manager留下意味深長既一笑，欲言又止地結束咗個面試。
自己覺得今次已經算係in得超過以往喺香港見工既水準了。如果今次失敗了，雖則都會幾失望，不過又只能說一句：已經盡咗力啦。無論結果如何，起碼都叫做累積咗少少見工既經驗。
如果再有機會去見工，真係要諗定未來幾年想做咩。但可唔可以請咗我先同你再一齊諗呀？
（待續）