同我差不多年紀喺香港長大既人，就算唔識「恭喜發財」既下一句係「利是逗來」，都一定知道「貨物出門」既下一句，係「恕不退換」。
喺呢個邏輯之下，任何一間鋪頭既門口，基本上就係一個令你由有得後悔變成無得後悔既人生交叉點。
所以「顧客永遠是對的」呢句野，正確應該係「顧客未行出個門口之前都暫時係對的」。出咗去？Sorry。
黎咗加拿大之後，發現買野係一個幾唔同既概念。因為喺加拿大，你買唔啱野係可以直接回水(refund)。
有一次老婆叫我去Walmart refund幾件貨品。我唔知頭唔知路，走到埋去個refund counter，正值遇到一位外籍金髮女職員負責幫我refund。
我：「我….想……refund。」
話畢，我手忙腳亂地拎出我想refund既貨品。
職員：「哦好呀。請問你點解要refund？」
同人講分手，最怕對方講既係乜野？係「點解…呀？」。職員問我點解要refund，我忽然慌張起黎。因為….點答佢呢應該？如果答得唔好，係咪要「復合」㗎？
我拼命諗一個合理既refund理由。
「我唔小心買錯咗？」咁你唔小心啫，關Walmart咩事？
「你件貨品有問題？」咁有問題，佢咪換另一件俾你囉。但我係想回水喎。
我係咪應該用分手最常用既：「我地性格不合」？但….點樣可以同件貨性格不合呢？
最終我硬著頭皮，用細到好似心聲既細既聲線慢慢吐出呢幾個字：
「I……don’t……need….it」
職員望一望我微微一笑，然後若無其事地同我講：「OK！無問題！你係咪想退返啲錢落X果張信用卡？」
我當場呆咗一下。
你幻想你同人分手，人地滿面笑容答你：「OK！無問題！咁你想cut Facebook定IG contacts」，你都會呆一呆吧。
就係咁，你件貨俾返人，人地啲錢俾返你。你一個錯誤既購物決定經過refund之後，就好似蘇永康隻歌名一樣 – 「從來未發生」。
人生總有好多後悔既時刻。
如果人生既抉擇係有得回水，我地既選擇會好唔一樣，又或者…其實都係一樣呢？
移民去加拿大有無後悔？我諗呢個問題，各人自有各人既答案。
不過至少喺加拿大買野後悔的話，你係有得重頭黎過。