不經不覺已經住喺加拿大超過三年。因為我入境時已經係PR (permanent resident)，所以我夠期可以申請做citizen (公民) 攞加拿大passport，不過先要通過一個英文測試。
加拿大入籍接受兩個英文考試既成績：IELTS同CELPIP。以前細個一畢業有考過IELTS，所以原本一心諗住考返IELTS；但精打細算既老婆發現CELPIP平啲，所以就上網報咗名考CELPIP。
CELPIP有兩個考試： General同LS。如果你係申請做PR就要考General，但申請做公民考LS就可以。CELPIP LS比General簡單，只有聆聽同口試兩剖分，唔駛考閱讀同writing。
聆聽考試會播放約6 – 7段幾分鐘既聲帶或影片，有對話、有新聞報導等等。聽完之後有2 – 3 分鐘答幾條MC。考試時間大約50分鐘左右。
至於口試，電腦會俾一條題目你，俾一、兩分鐘你準備然後佢就會開始錄音。考試大約有4 – 5條問題，全程考大約20分鐘。由於全程都係自己對住電腦講野，唔會有小組討論，所以你係連講「I agree with you」既機會都唔會有。
考試場地喺downtown既Calgary Tower附近。一如細個去考會考一樣，我提早好多去到試場，因為好緊張遲到，更怕人有三急要搵廁所。
去到試場門口，見到有個女人席地而坐。我地兩個互望咗一下，女士開口問我係咪黎考英文，然後大家就閒聊起黎。原來佢本來係上星期考既，點知去錯咗個試場，白白無咗幾舊水（加紙喎講緊）。我慌張地拎返我個考試detail黎睇，幸好我無攪錯。
過咗二十分鐘，條隊慢慢由我地兩個人變成一條十幾人既人龍。試場既工作人員呢個時候打開門，開始叫我地五人一組咁入去試場。
試場既檢查比想像中嚴格，感覺好似喺機場過海關。除咗唔可以著䄛，亦要放低身上所有隨身物品，一張紙 – 連廁紙都唔可以拎入去。我其實有少少鼻塞，唯有希望唔好考考下要抺鼻涕。
考試正式開始。我發覺考既題目比做練習深。唔係因為啲英文難啲，而係因為MC啲答案個個都好接近好難揀 。原來試場係有紙筆俾你一路聽一路寫筆記，但對我無乜幫助，因為我寫到好似啲中醫寫藥單咁撩草，寫完都唔知自己寫乜。
做下做下，忽然有人聲overlap咗我段影片既聲音。原來坐我後面果個姐姐仔已經做完聆聽進入口試。雖然又不至於令我聽唔到啲聲帶，但令我越來越分心。
好不容易捱過聆聽測驗，開始到我考口試。我越考越緊張，因為覺得聆聽已經考得麻麻地，然後我睇到第一條口試既題目令我既緊張指數再上升：畫面上出現一個類似community garden既地方，入面有好多個花圃，仲有好多唔同既人喺度做緊各式各樣既野。
我心諗死火了，因為我對種野係無乜概念。
「花圃」個英文係乜野？Plant box? 唔識唯有老作啦，外國人應該明啩？（考完check返，應該係叫planter bed或者garden bed)。
更麻煩既係：我點形容佢地做緊乜野?
例如耙鬆啲泥點講？ Make the mud more relax? 啲泥re唔relax我就唔知，但我呢刻就好唔relax。
思緒混亂之間，錄音已經迫不及待要開始。我把心一橫：反正我都講唔出啲人做乜了，不如作個故仔黎濛混過關。
例如圖中有個阿伯自己一條友喺個花圃度唔知做乜。我就話：阿伯本身退咗休無乜野做，所以黎呢個community garden度幫下手。不過年紀大，做咗幾下好攰。佢可能心諗：如果有啲後生幫下手就好了。我有認真考慮過幫阿伯改埋個假名浪費下時間，最後忍住咗。
如是者亂作之下，好快就過咗二十分鐘，我答哂所有題目。我回頭一望，成個試場只係得返幾個人，大部分人已經考完走咗了。到底係我做得太慢，定係啲人提早放棄呢？
過咗兩日就收到CELPIP既SMS公怖成績。聆聽12分滿分我攞到9分，同我自己預料既差不多吧。
但意料之外係口試我竟然有11分。雖然我都幾有信心會pass （12分攞4分就pass），不過我本來估自己攞6 – 7分左右。先旨聲明：我英文講既能力絕對唔高而且有極重港式口音，又勁多生字唔識。我覺得係因為我果日好鼻塞，攪到鼻音好重成個西人咁所以佢俾高分我。
阿囡聽到之後難以置信，畢竟佢好清楚佢老豆我講英文係無尾音。但我相信阿囡暗地都鬆了一口氣，因為佢深信如果我唔pass，我係會俾人遣返返香港……
