今屆奧運喺巴黎舉行，好多比賽都喺我地朝早至中午既時候發生，令我地一家唔駛捱眼瞓都可以撐下港隊同加拿大隊。
所以同大家一樣，我地有幸見証江旻憓女子重劍反敗為勝勇奪金牌既一幕。
江旻憓既奪金之路，特別係呢場大落後既反勝已經令人感動萬分。但佢對待勝負、做到「勝不驕、敗不餒」既氣度，令我更加佩服。
睇返關於江旻憓既一啲舊聞，原來喺2019年，江旻憓登上世界一姐寶座，不過佢返港既時候竟然喺傳媒面前喊。原來佢當時覺得自己並無發揮出自己應有既水準，自覺唔配做世界第一而落淚：「我覺得我配不上，剛剛的比賽打得不好，但又有好消息，我要更努力才能保持這位置。打這麼差，好失望，我距離心目中的世界第一還有很大距離。」
贏咗都唔開心？輸咗就話唔開心啫。
其實輸咗又好唔好唔開心？我成日都好怕小朋友唔輸得，所以每次小朋友輸咗我都慣性地同佢地講：「輸咗唔緊要呀，唔好唔開心」。
但我有時回想：小朋友對勝負全無反應全無感覺咪仲大鑊？小朋友咪樣樣野都好似我返工咁：嗱老細，我盡咗力㗎喇。
江旻憓既經歷話俾我知：因為江旻憓清楚自己既能力，儘管獲得世界第一但卻未能盡全力，所以佢雖站於頂峰而不驕，謙虛地去繼續改善自己。
亦因為相信自己既能力，儘管佢喺今次奧運決賽落後1：7，依然可以保持信心，身處劣勢而不餒，最終成功封后。賽後佢本人都話：「本身輸得太多，我知道自己唔係呢個水平」。
如果有一樣野我希望兩姐弟會從女劍神身上學習，除咗佢永不放棄既精神，我諗就係超然喺勝負之上，時刻以「發揮最好既自己」為目標。
喺一個舊既訪問中，江旻憓係咁講：「攞冠軍果時既狀態，就係我想打乜野就打到乜野。無論果一劍贏輸都好，我都唔會介意，因為我真係好專心，當下人劍合一」。
喺度恭喜江旻憓成功奪金，亦祝福各位參賽既健兒無論輸贏，都能夠發揮到自己努力既成果！
(Photo by Jari Pestelacci/Eurasia Sport Images/Getty Images)
