我細個果陣同大部分小朋友一樣有儲閃咭，主要係儲龍珠既咭。當然，各式日本動漫既咭我都唔會放過：Street Fighter、聖鬥士、Slam Dunk……。
我應該從來都無試過儲齊過一套咭。但每俾一蚊去抽一張咭，抽到一張唔重複、自己鐘意既角色既咭果時，感覺自己好似賭神抽到隻吸手A一樣無比亢奮。所以曾經何時，因為百佳門口果部白色既抽咭機，我會充滿期待地同阿媽去超巿。
意想不到過咗幾廿年到我做咗人老豆，我會喺加拿大同我自己既小朋友一齊再喺超巿儲閃咭。
話說加拿大有間叫做Loblaws既超巿公司，類似香港既牛奶公司吧。最近佢地做咗一個marketing campaign：只要喺旗下超巿藥房每買夠25蚊加紙，就會送一pack (一pack 4張) Marvel既人物角色咭俾你。全套咭總共有90張，其中6張係「foil」- 類似閃咭，不過佢唔係鐳射閃法，只係有少少反光既「令」面。
起初我地無留意到呢件事；只係有一日喺Superstore買完野忽然個收銀俾咗一疊卡我地，打開咗先發現原來係Marvel既人物角色咭。我兩個小朋友咁啱最近同我喺屋企睇咗Avengers開始接觸到Marvel既故仔，所以對套咭有興趣。特別係當我地返屋企打開果廿幾張咭，發現竟然係無乜重複；一次就完成廿幾%，咁何不儲哂佢呢？
阿囡同弟弟興緻盎然地用電腦整咗個document去紀錄自己儲咗邊張咭。作為一個IT人（其實唔關事），我索性趁此機會教埋佢地用Excel整個表同寫啲formula去數自己有幾多款咭、有幾多重複，令一早已經當佢老豆係流既阿囡露出少有佩服既表情。
老婆見到我地原來竟然有興趣儲咭，於是佢亦行動了。而通常只要老婆一行動，事情就不會半吊子：佢一定會儲哂先會收手。我有時覺得如果佢係做殺手，佢一定係會斬草除根果類殺手。
首先老婆去買野果時，見到上手買野果個人唔要啲咭，佢就會主動問人地可唔可以送啲咭俾佢 (通常老人家或單身人都唔會要），因此收集到一啲extra。然後佢返工見到啲同事，大家討論起黎，發覺原來大家都有幫小朋友儲，於是開始同啲同事用重複既咭互相交換。
我地同人地交換咗兩輪、又因去超巿買野拎多咗咭返黎，但始終都差幾張我地要既咭。同啲賭仔買咗十次都唔開大果陣既心理一樣，我地開始建立各種theory：可能我地呢區既超巿係無果張咭要去第二區、可能呢幾張咭係特別啲所以少有啲、可能有人霸咗某一張咭….
但我諗同我細個儲咭既一大分別，係宜家有internet、有social media，我地宜家擁有既係資訊。老婆上網發現喺Facebook度直頭有群組喺度討論點樣交換啲咭，於是佢喺果度同另一位家長聯絡好，之後約喺超巿交收。係老婆既執行力下，經過一個weekend，我地就將餘下既咭儲完，仲要儲咗兩套俾兩姐弟，等佢兩個唔駛爭皆大歡喜。
長輩見到我地一家大細一齊癲，問點解要儲閃咭？有乜用？
有人話：啲野擺得耐，最終就會值錢。我唔知呢個係咪真實，因為我啲MPF之前都擺咗好耐，不過…我肯定佢地無變得更值錢。
我覺得當年恒宇仁龍拳既宣傳易廣告道對「儲野」既用途提供咗一個答案。
「點解要學恒宇仁龍拳？」廣告中既旁白如此發問。
「開心！」廣告中著哂恒宇仁龍拳制服既小朋友們一齊大聲叫喊著。
小朋友未必會因為學咗恒宇仁龍拳就好打啲、唔會放入resume就增加咗第時既工作機會、亦大概唔會因此大個咗會搵到好多錢。
正如小朋友未必會因為儲咗閃咭第時會因為啲咭升值而成為有錢人、亦大概不會從呢啲咭度學會任何事情。
但開心，不就足夠了嗎？