今次除咗探親同處理少少私事，我地同時借此機會做下遊客，喺香港食玩一番。
老婆去親旅行都會開張spreadsheet寫低哂啲detail。今次佢除咗寫低咗我地要去既地方同要買既野，佢仲整咗個「to eat」既清單。最終我地算係不辱使命，完成咗個清單上大部分item： 壽司郎（我地走咗之後先開所以想試下）、自助餐、日式同台式火鍋、茶餐廳港式美食、港式粥粉麵、譚仔米線、街邊篤魚蛋……(不能盡錄)。當然，仲有各樣中西式甜品。
美中不足既係同弟弟去食茶餐廳想俾佢試下菠蘿油，點知佢一開口就跌咗成塊牛油，結果downgrade咗做菠蘿包。而當初豪言每日一甜品（好奇怪既目標….)，最終亦因為太飽又或者有啲唔舒服沒有達成。
香港自我地離開後似乎多咗唔少新景點，好似 M＋、故宮博物館等等，不過我地都只係過門而不入，覺得小朋友未必識欣賞博物館館藏。我地都係隱陣去返大路既太空館同科學館。講開科學館真係好抵玩，入場每人都係幾蚊港紙，喺Calgary 去科學館要成廿蚊加紙一次呢 (無買pass的話)。兩姐弟喺科學館同太空館兩館就玩足一整天。
不過講到對小朋友黎講最好玩既，始終都係去廸士尼吧。
其實同兩姐弟已經去過廸士尼好多次，不過當我地去到欣澳，聽到月台廣播：「我地即將帶你進入香港廸士尼樂園既奇妙世界」，心入面依然有一陣久違咗既興奮。
樂園有新既Frozen景點，除咗還原Arendelle既小鎮風貌，仲有3個新既遊戲。當中以「夢幻小船」令我最印象深刻，因為入面做既場景同人物好生動而迫真，真係感覺置身於個故仔入面一樣。比較失望既係「森林小天地」同真人版既Elsa同Anna互動，可能個設定係比啲較細既小朋友，兩姐弟唔係好投入。我好想投入，但Elsa姐姐無睬我。
可能係閒日吧，樂園比想像中少人。因為唔駛點排隊，天氣又熱，我地儘量揀室內既遊戲重複地玩。淨係Antman果個射擊遊戲我同弟弟至少玩咗十次。
以前黎親廸士尼，大多數都係放煙花前就走；因為兩姐弟去到果個時候多數已經謝哂，而且又唔想同其他遊客一齊迫住走。不過今次作為遊客，幾歹都要玩到最後一刻。
城堡已經數碼化咗，夜空上一邊綻放煙花，城堡一邊隨配樂展示不同既動畫。個人覺得個show有啲長，攪到中間有少少悶場。不過當煙花放到最後，果種唔想咁快完既離愁別緒卻加倍襲來。
「下次再黎喇！」
以前每次同兩姐弟離開廸士尼出口既時候，我都會好唔捨得咁講呢句說話。今次講起黎别有一番感觸，因為今次一別，唔知幾時會返黎了。
去到月台，又再聽到熟悉既地鐵廣播：「歡迎乘搭廸士尼線。我地即將帶你返去現代化既香港。」
奇妙既一天，喺離開樂園既列車中結束。而今次難忘既香港之行，亦終於進入尾聲了。