[姐弟海外升學記] (二) 漸進式分離(上)

決定要走，就要同自己屋企say goodbye。

我地屋企係係幾年前入伙既。因為當時弟弟出世，舊屋唔夠住，所以搵一個大少少既單位，預左住返佢起碼357年。

我相信每個人對自己既屋企都總係有好多回憶，尤其係當你有小朋友既時侯。

對於我黎講，我最記得：

係醫院接弟弟返屋企果一刻；
每一年兩個小朋友生日簡單而隆重既切餅儀式；
弟弟係邊度跌親，家姐係邊度駁我嘴；
仲有無數晚攬住佢地講故事既片段……

當年由於老婆佗住弟弟，所以大部分時間都係我過去睇裝修既進度，見証呢一間屋由得四幅牆既空殼，到填上我地既需要，慢慢變成一個屬於我地既家。所以一想到要到離開呢一個家，要再睇住呢個家「undo」得返四幅牆，就覺得好傷感。

我心目中幻想既移民，係有幾十個箱咁一野搬去個貨櫃度寄去外國，然後係走果日依依不捨咁離開屋企去機場。

但事實上，我地並無咁做。

成件事要由呢個移民project既project manager – 我老婆開始講起。

話說我老婆好鐘意執野，鐘意到一個地步可以話係佢既啫好。雖然我唔明白，我每次整亂啲野果時，明明係創造左佢執野既機會，但佢每次都黑面。

anyway….

作為執野方面既豬隊友，今次離開香港既project，完全由我老婆一手包辨。

老婆今次既策略，用俾人打黎做比喻（唔知點解我淨係諗到呢個例子） – 如果一炮過執包袱寄幾十箱野走果種移民係俾人好大力咁打一拳，老婆既方法可以稱得上係俾人好細力咁打好多拳，我姑且稱之為「漸進式分離」。

首先，我地漸進分離左我地間屋。因為種種原因，我地決定提早離開我地既住處，搬左去酒店住。所以我地係真係離開香港果一日，並沒出現難離難捨既畫面，因為感覺上我地當自己去左旅行咁，由酒店去機場而已。

不過老婆成個moving plan既精髓，係在於不知不覺間，漸進分離左我地成屋既野走。唔講，以為係有賊入屋每晚搬少少野走咁。

至於係點做？下回分曉。

Photo source: https://www.flickr.com/photos/vlien/5838665037/