以前喺香港跟公司group plan每年洗一次牙，次次個牙醫都係極速收工，快過去QB House剪頭髮。
加拿大啲牙醫係完全相反。每個牙醫都會好似考古學家掘恐龍化石咁好仔細挖掘你既牙垢，所以無返個半鐘都唔會走到。
隔咗半年時間，又要洗牙了。我提早咗十五分鐘去到診所，reception叫我坐低等候。等候大堂既電視上播放各種不同牙科手術既影片，我覺得好似你俾個就生得既大肚婆睇分娩過程 – 你係咪嫌我唔夠緊張？
因為就唔啱時間，診所將平時睇開我既一位北歐女牙醫換咗做另一位華裔既女牙醫，我叫佢做娟姨吧。娟姨由reception帶我行入去佢個partition，去到發現全個partition都係用Toy Story主題既wallpaper。我諗我係去咗兒童區。
娟姨開始檢查，睇咗一輪，佢果然用同小朋友講野既語氣同我講：「都唔錯，算刷得ok又無蛀牙，算你合格喇！」
睇完有無蛀牙，娟姨用一條尖既野 (唔知係乜野因為我睇唔到) 篤我啲牙肉睇下有無出血。佢一路篤、一路用開玩笑既語氣同我講：「噢…你比起上次多咗地方流牙血喎。你要俾啲心機整返好佢喎，唔係下次你見返Laura (北歐女牙醫) 佢一定會殺咗你。」
咁到底我係會流牙血死先定係俾佢殺死先？
檢查完牙肉，到咗我最最最唔鐘意既「挖掘古蹟」時間 – 即係所謂既scaling。牙醫會用個刮大力刮走我啲牙石。因為牙醫好大力刮，每次我整完都覺得棚牙有啲痛。
開始前，娟姨用佻皮既語氣同我講：「嗱，記得有乜唔舒服就發聲或者舉手，唔係我就會繼續折磨(torture)你㗎喇。」
我對佢既提議有啲納悶：我宜家成口都係你啲「架生」，除咗「呀。。。。」我仲可以發咩聲？
雖則稱不上係折磨，不過個過程絕不舒服。但作為一個幾廿歲既大男人求救好似有啲樣衰，我決定唯有忍耐。忍耐咗我諗三十分鐘，娟姨終於攪完，然後繼續用同小朋友講野既語氣同我講：「嘩！你做得好好喎！Good job！」
做完最痛苦既scaling，跟住就到比較輕鬆既polishing。呢個類似幫你啲牙打蠟既過程大約15分鐘，因為唔會痛，我原本好繃緊既神經算係稍為放鬆下來。
經過差不多90分鐘既搏鬥，終於洗完牙了。娟姨叫我執齊野，然後同我講：「下次再見喇」。我覺得如果有人同你講再見你係會有抗拒既，果個人一定係牙醫。
總括黎講，我覺得喺加拿大呢度洗牙既服務無香港咁趕亦較仔細，不過對我黎講亦有兩個唔好處。
第一係溝通障礙。其實同睇醫生一樣，要用英文形容自己啲牙既問題對我黎講好難。淨係形容邊隻牙已經好難解釋：例如「犬齒」英文係咩？Dog teeth？我諗個牙醫聽到應該會同我講佢地黎度唔睇動物。
第二係價錢。加拿大睇牙好貴，以我洗一次牙為例，45分鐘scaling要CAD 200、polishing要CAD 60，照張X Ray CAD 40，醫生檢查CAD 60。睇一次牙洗咗CAD 360， 即係差不多港紙2千幾蚊。
所以比起棚牙既痛，喺呢度睇牙真正痛係俾錢果下。好彩自己份工加埋老婆份工都有保險cover ，如果唔係我啲牙未洗哂，我啲錢應該會先被佢洗哂。
