學校有幾日fall break假期，我地一家四口趁機第一次黎到墨西哥既Cancun渡假。
老婆一年前已經喺Cancun一間resort book咗一個all inclusive既package。All inclusive顧名思義即係你只要預先俾咗錢，去到酒店後吃喝玩樂都唔駛再俾錢。
我覺得呢個all inclusive既idea真係不得了（大鄉里mode）。
首先，成個resort入面二十幾間食肆、酒吧同埋coffee shop變相組合成一個全日供應既多國菜buffet。你可以完全唔駛擔心有時限、碟野食貴唔貴或者驚叫錯野，只需擔心自己有無quota去消化咁多美食。七日內我地試咗其中十間餐廳：有日本居酒屋、日式鐵板燒、意大利菜、黎巴嫩菜、墨西哥菜、扒房、自助餐等等。餐餐都由前菜食到甜品，然後路過coffee shop又順手拎杯雪糕、蛋糕或者朱古力……
另外，平時同兩姐弟去Calgary啲機鋪，好多時都係俾佢地係咁易打兩鋪就算，有時甚至係睇人玩就當自己玩咗。黎到resort，呢度既機鋪可以免費俾你不停任玩，真係玩到你唔玩。
Resort仲有一個water park任玩，而且離我地房間好近。小朋友去玩slide或者lazy river，我就安靜坐喺池邊睇書或瞓覺。老婆成日叫我𥄫女（好多比堅尼），令我無法分辨佢係考我視力定係定力。
到咗夜晚，一家大細又可以一齊去睇show。每晚中心都有唔同表演，由魔術到雜技再到歌舞show都有。唔啱睇嗎？咪又走去coffee shop食甜品囉。
喺度玩咗幾日，我覺得自己過緊皇帝式生活，只係無後宮佳麗三千。不過，儘管今次個experience好正，如果問我同老婆會唔會短期內再返黎，我同老婆既答案都係NO。
事實上喺成個假期當中，有唔同既resort職員好積極地向我地promote佢地既membership、或者買ticket兩年內訂房平一半等等唔同既offer，但我同老婆都統統回絕。其一原因，係因為已經變咗加拿大寒底既阿囡，唔係好受到墨西哥既天氣。如果成個trip只係喺室內飲飲食食又好似無乜意義。
老婆既主要原因係覺得唔想俾個membership或者半價等等既offer綁住，變咗一定要未來一兩年再返黎。淨係加拿大都仲有好多地方未去過呢。
我同老婆一樣意見。如果俾我2026可以去旅行，我其實情願用果筆錢去多倫多或溫哥華睇世界盃。Once in a lifetime experience嘛。更大原因係因為我內心深處唔想再感受多一次check out果陣，好似灰姑娘過咗十二點鐘失去魔法既果種失落。因為只要我一回想自己交返張房咭俾佢、然後下一秒開始我就無得再任食任玩、仲要重返現實做牛做馬，我就覺得自己灰過灰姑娘。
All inclusive雖好，不過都係等我想再hea啲果陣，兩公婆返黎再慢慢嘆吧。