尋晚聽《住加男人》Youtube直播，探討喺加拿大打工既香港移民有無覺得自己被低估咗，同埋做咗個survey問下啲聽眾覺得係因為心態定際遇。好多節目既聽眾都覺得兩者皆有。
喺度講下我自己既經歷同體會。
我喺加拿大做緊第四年野，轉過一次工，好幸運一路都係做返本行。我既第一份工係個僱主喺LinkedIn搵我（所以LinkedIn個profile好緊要)，見一個team lead既職位。我最後失敗咗，hiring manager話佢喺二㨂一之間㨂咗另一個人。講真我當時都幾失望，因為我自問自己好fit個role，interview亦表現不俗。好彩佢有個再junior啲既role，話唔駛interview會即刻請我，我欣然接受。
我當時無覺得自己被低估。畢竟新移民人生路不熟，COVID期間搵到工已經極好彩，都唔expect會做返以前既title、搵返以前既人工。移民前輩教落：心態影響你既移民際遇，我不能同意更多。
不過，心態能影響你既際遇，但際遇亦同時能夠影響你既心態。
後來，我知道咗我當日interview輸咗俾邊個人。因為公司會按同事入職既月份celebrate，同我同期既只有一個team lead，所以我好快知道公司請咗邊個而無請我。對方係一個本地既白人女仔，我自信自己既經驗俾對方好得多 (因為LinkedIn睇到)，不過我依然無覺得自己被低估，因為我自問interview既時候，自己都無信心可以喺呢度第一份工就做到一個team lead。再者自己當時無加拿大經驗，請一個有加拿大經驗既人比較合理吧。
但開始咗返工、慢慢駕輕就熟，知道自己既能力其實同樣喺加拿大適用；然後每次聽到有同事講果位team lead既唔好，及後同佢交手亦覺得佢無料到，個心或多或少有啲戚戚然。然後，我返工既心態慢慢變成日本漫畫《幽遊白書》既戶愚呂。
《幽遊白書》（文學巨著，無睇過既誠意推薦你睇）既故事係講主角幽助由一個普通中學生變成要對付妖怪既偵探。主角其中一個敵人，就係一隻叫做戶愚呂既妖怪。戶愚呂可以按對手強弱而隨意控制自己啲肌肉出幾多%力。由起初20%既普通大隻仔，變做45%大隻佬，再變做60%既筋肉人；出多啲%力，肌肉就越發達。喺個故仔大部分時間，戶愚呂都未曾出過80%或以上既力就可以輕鬆輾壓對手。
我每日就好似戶愚呂咁，摸索用幾多%力；我內心慢慢泛起一種念頭：拎住junior既糧，無理由出senior既力嘛。特別係當老細交帶我做既第一份report，我用比香港長5倍既時間去交，但佢竟然無催我。原來呢個就係個expectation。
慢慢地，我開始掌握到個力度。
不過喺我掌握到力度既同時，公司生意卻好咗。宜家問題來了：以呢個工作量同我宜家用既力，我唔會handle到。
我要俾多啲力。俾80%…90%…100%…然後..開始要俾110%…120%…。
如果你有睇過《幽遊白書》，你就知道戶愚呂最終唔係俾主角打死，而係因為要對付主角谷咗120%力，結果先會死。
過咗兩年後，佢地終於升返我做team lead。但當我知道我要用120%力去攞果份我原本用60%力就出到既糧，我忽然間切換咗去超巿買野既心態：我覺得唔抵。而且當時佢地亦由全work from home變成要強制返office，令原本我適應咗既生活節奏再度失衡；可以幫下手接送小朋友都攪唔掂，老婆亦更大壓力。
於是我決定要轉工，情願用少啲effort去賺同樣既錢。我深知呢個心態唔係好健康，我發誓：新工我要加把勁。
於是新工返咗幾個星期，我見有個同事做緊樣野好struggle。我舉手話幫佢，但老細即刻超級nice咁同我講：「唔係你既role，唔駛幫佢手。等佢自己慢慢攪，唔好攪到自己OT。」
到底係心態造就際遇？還是際遇建立心態？
我睇唔清。但當你遇到一個好chill既老細叫你留力，你係好難有意欲去發力。
「30%。」
我彷彿聽得見老細用戶愚呂既聲音向我耳語。
#有無幽遊白書fans
