好多考直私但唔考優才既家長除左佢兩個校舍既地點未必就腳，另一個我成日聽既理由就係”好煩，又上堂又做功課”。係度分享一下優才多元資優生家長培訓課程既究竟係點，等大家衡量下”同唔同佢顛”。
入讀資格
首先呢個課唔係真係你想讀就有得讀。你個仔女要過到第一次面試，家長再過埋第二次面試，你既仔女成為”優先備取生”你先有得讀 （可以參考返成個優才收生程序）。
點解要讀
個原因好簡單 － 你唔完成佢係唔會收你個小朋友。基本上真正既offer大約3月就出，但係上堂上到5月。若你拎左offer但之後唔交功課唔上堂佢都會取消返你個位。
有細佬妹既留意：若你完成左個course呢到張cert，你第2個小朋友既時候可以唔駛再讀。
完成條件
成個課程有8個1.5小時既課，全部都係閒日（星期四）夜晚7:00上到8:30，地點主要係將軍澳校舍（除左最尾果堂係旺角）。
要完成呢個課程你需要上至少7堂，同埋交2份功課。
課程內容
呢8堂1.5小時既堂其實係好講座形式。家長去到禮堂坐係度聽唔同既speaker講下面既topic:
- 從心出發，以品帶學
- GT Culture & Utopian Education
- The Education Thought of John Dewey
- 因材施教：九型人格
- 智力評估與多元智能
- 科學資優生的培養
- 學好英語，從小做起
- 優才小百科： 生命及心靈的提升
通常佢地個主講會講一個鐘；剩返30分鐘會講下功課，或者請d 仔女已經讀緊既家長分享。坦白講除左要去到將軍澳呢個effort之外唔算好大effort，無小組討論無即場功課，多數齋聽。
功課
功課總共有2份，每份通常都有1-2個月做（當然你知個內容你可做定）。
第1份習作係一個讀書報告。佢地有一個booklist，你睇左其中一本書之後寫一份閱讀報告，大約800 － 1000字，中英文都得。話係閱讀報告又唔完全係free form咁寫，佢地有個template大約十條問題你跟住佢答就得 (e.g .你同意或不同意呢本書的觀點）。
第2份習作叫做家庭潛能分析報告。家長（兩個都要) 做一個online既心理測驗睇下自己係邊一種9型人格；小朋友再做另一個online心理測驗睇下佢有乜智能，跟住就答一份有十幾條問題template。同第一份功課一樣大約800 － 1000字。
兩份功課我覺淨計寫既時間大約2 －4個鐘都做得晒（好專心地做），當然未計你睇書果d時間。
聽我講到呢度。。。報？or not to 報?
