去咗外國讀書，係咪就無哂壓力？
睇住讀緊小學乜都唔駛做既弟弟，真係無壓力到我有啲壓力：到底我地係咪要搵啲野俾佢做？佢到底返學有無學到野㗎？
相反地，家姐升中之後，開始要重新面對來自功課、測驗、仲有group project各種workload同deadline帶黎既壓力。我知道比起香港可能都仲係濕濕碎，不過由無變有、由零變一既轉變都需要時間適應。
所以我諗無論喺邊度，點樣面對同應付壓力，依然係一個好重要、而且係要學既能力。
喺朋友介紹下，睇咗由史丹福大學運動醫學中心既首席防護師山田知生寫既《史丹福大學 – 最強身心鍛鍊術》。呢本書結集咗作者過去十九年喺史丹福大學訓練精英運動員果陣，幫啲運動員消除疲勞壓力、保持好身心狀態既方法。其中一個我覺得幾apply到落小朋友既方法，就係陪養一個Growth Mindset。
▋Growth Mindset vs Fix Mindset
有Growth Mindset既人，相信自己人生係自己掌握。經練習同訓練，任何技能都可以提升。佢地重視過程多於結果，比起他人評價，更重視自己既努力同埋意志，認為失敗都係學習既機會。
與之相反既係有Fix Mindset既人。Fix Mindset既人會覺得技能、知識同能力係天生無得改變，認為結果就係一切，比較在意其他人既眼光同評價。
根據史丹福大學從腦科學角度既研究，發現兩種mindset既差異係源於腦部分泌。喺Growth Mindset之下，腦部會分泌多啲多巴胺 (激勵鬥志既荷爾蒙) 以保持動力去應付壓力；相反喺Fix Mindset之下，腦部會分泌多啲正腎上腺素 (冷靜思考同專注力既荷爾蒙) 以提供專注力去應付眼前既難題，但如果喺達成目標時分泌得唔夠多巴胺，久而久之連正腎上腺素都會失效，整個人就會陷入「望唔到終點」既想法，然後越來越無力、無幹勁。
所以有Growth Mindset既人，會比Fix Mindset既人更容易積極、身心更唔容易被壓力打垮。而想培養小朋友有growth mindset，最緊要就係著重小朋友既努力，而唔係佢既天賦。
例如小朋友數學考試考得好，比起讚佢「都話咗你天生數學好，所以考得好囉」，讚佢「我好欣賞你有努力溫習，所以有好成績」更有助佢建立Growth Mindset。同理，如果考得唔好，可以問佢：「你覺得用多啲時間溫習會唔會有幫助」，而唔係同佢講「乜你咁蠢㗎」。久而久之，小朋友會明白自己只要努力就能帶黎轉變，而唔係被受天生條件所限。
我諗其實除咗小朋友，大人亦同樣apply。Growth Mindset唔係天生既，可以後天培養。如果職場上都有呢種鼓勵努力既文化，相信productivity都會提高。
老細，如果你有睇到呢篇文，我其實有個更快可以切換Fix Mindset去Growth Mindset既方法：你fix咗我份糧，我梗係Fix Mindset啦。試下grow我份糧，我就自然有Growth Mindset㗎喇。