幻想下移咗民既你出去剪頭髮，髮型師問你想點剪，你想同佢講：「上面偷薄啲，側邊收一收，後面唔好剷咁高」。
點講好呢？「Steal thinner on the top, collect a little bit from the side, don’t shovel too high from the back」？
我無勇氣去証實有無人聽得明呢句英文。還好，移咗民幾年我都唔駛出街剪頭髮，因為我同弟弟個頭都係由老婆一手包辦。
我係2020年暑假移民過黎加拿大，當時正值COVID。唔好話去剪頭髮，大家連出街都唔係好敢。反正都唔會出去見人，老婆話佢有架生，不如索性喺屋企幫我地剪。
每次老婆都係先剪我、後剪弟弟。用IT既術語比喻：我個頭係development environment，弟弟個頭係production environment。即係話，我個頭係拎黎做測試同練習用既，攪round咗都唔緊要，未有十足把握之前，千萬唔可以亂咁apply落弟弟個頭度。
經過幾年用我個頭黎練習，老婆既理髮技術明顯進步咗。先唔講個結果，淨係講個過程已經大有進步 – 以前起碼要一個鐘，宜家三十分鐘內攪掂。
我覺得大家移咗民之後，多多少少都會練就一啲本來無諗過會學識既本領。唔係話留喺原居地學唔識，只係好多時，新環境會促成新技能。
如果我地仲喺香港，老婆未必會學識剪頭髮，因為：1）無時間去學；2）其實又唔係太大必要，行五分鐘落樓下QB house快靚正；3）我係絕對唔會提供我個頭作為實驗場地。
隔咗兩個月，頭髮又開始長，所以老婆又幫我地剪頭髮。果然唔駛三十分鐘，老婆就剪完我個頭。
我（未戴眼鏡）：「你覺得如何？」
老婆：「哦，頭髮既野好快長既。」
做乜迴避我個問題。
我：「咁即係好唔好呀。」
老婆：「你返工可以戴帽，都Ok喇。」
咦你直接進入安慰模式喎。
我個頭型好怪，頭頂好似生咗兩隻角，所以頭髮一長就會好似Marvel電影Wolverine個頭咁兩邊突起。
我戴返眼鏡照下塊鏡，老婆將我個Wolverine角順利收伏。我發現我個髮型又同上次唔同咗，老婆應該又睇咗另一條Youtube片，攞我個頭黎試新剪法吧。無論如何，我對我個新髮型都幾滿意，應該有一排都唔駛戴帽了。
我諗我唯一既comment係：「老婆，下次可唔可以steal thinner on the top？」