隨住兩個月既暑假完結，兩姐弟新既學年又再開始，阿囡亦終於升中了。
阿囡喺加拿大升中唔需要好似當年喺香港升小咁經歷考學校或面試，唔駛填表抽簽亦無話間學校係band幾、係英中定中中…所以對我黎講，感覺阿囡不過係由grade 6升一級去grade 7而已。
阿囡倒係幾期待升中，因為今年除咗一啲必修科，佢仲可以選修一啲自己有興趣既科目，有啲似我細個讀大學果時既elective。阿囡揀咗樂器班、法文班仲有一科叫做innovation既設計班。
我依稀記得阿囡升小一果時，佢孭果個書包仲大過佢個人。今日既佢已經係一個同我差不多size既少女了，儘管佢個書包依然因為帶咗太多無謂野而大到不成比例。
小朋友升中進入另一學習階段，同時踏入叛逆青春期，我地作為家長都面對另一階段既挑戰。特別係作為一個移民家長，我覺得除咗代溝，我同阿囡仲有另一些距離。
第一樣係語言既差距。阿囡宜家同我講野幾乎有80%係英文了，而且越講越快。每次聽佢講野，我都覺得自己好似聽緊明珠台賽馬直擊。
另外，佢總係會用一啲我唔識既英文字，令我摸不著頭腦。例如佢好鐘意用「Yeet」呢個字，我上網查先知道係解用力扔咁解。但喺我既詞彙裡面我只係識得「Throw」。
總之同親佢講野，我都覺得自己好似考緊英文咁，個人好攰。
第二樣係文化背景既差距。我唔係喺外國長大，佢喺學校以至生活上經歷緊既所有野我都無經歷過。其實唔好話我，連細個喺度讀書既老婆都話有好多野同以前唔同咗。
例如以前學校係唔會講咁多關於Indigenous (加拿大原著民）既野，但近幾年自從residential school一事之後就多咗好多。另外，近來社會上多咗關於跨性別、變性、不同性取向等等既話題，作為華人家長既我自己都未消化得來，仲點會識教佢？
對我黎講，阿囡升中後，佢既學業已經係一個相對low priority既問題了。或者換個角度講，我唔覺得自己宜家仲可以喺佢學業上幫到佢啲乜野。但想要喺我地之間既語言文化差之下了解到佢既少女心事，對我黎講先係最重要、亦最令我頭痛。
畢竟，我連老婆既心思都未估中過嘛。
還好阿囡到目前為止都幾肯同我講野。基本上每晚阿囡都會捉我傾計，雖然大部分時間都係無謂野。有教書既朋友同我講，記住珍惜小朋友仲肯講野俾你聽既時間。因為代表佢都仲信任你、仲想include你喺佢既世界入面。
早排同弟弟睇書，講到有個科學家做咗個「貓咪翻譯機」，翻譯唔同貓叫聲代表啲咩意思，例如肚餓、唔舒服、想人陪佢玩之類。
如果有部「子女翻譯機」，可以幫我翻譯下阿囡講既野再加埋中文字幕，我諗我會即刻俾錢。不過如果又真係有呢種技術，我諗我應該要先買返部「老婆翻譯機」。
