上次考完英文能力試submit咗個Citizenship application，正納悶點解無乜聲氣，轉個頭就收到IRCC (移民局) 電郵通知我去考Citizenship Test。
加拿大既入籍考試係online考既 (即係可以喺屋企考）。只要喺online test既20條多項選擇題 (MC) 中答中15條就合格。由收到IRCC通知開始，你有30日時間去考，任何時間login入去考都可以；考試有三次機會，但如果考咗三次都唔合格就要去見移民官。
考試既內容全部紀錄咗喺一份68頁既考試範圍入面：有加拿大歷史、重要人物、人口結構、政府架構同制度、各省份特色等等。
喺眾多考試內容當中，考加拿大政制既問題我覺得相對容易。平時有睇下新聞、或者有上YouTube聽下《住加男人》啲節目（特別係近來開始既《大加早晨》），基本上問題不大。我比較怕既係考歷史事件同人物。對於我呢個講拿破崙淨係會聯想到蛋糕既人，要讀加拿大既歷史真係幾辛苦。講真，唔好話啲古人，我有時連宜家同事啲名都記唔到。
我由submit咗個application之後就已經開始溫書，睇過一次份考試範圍，亦有做過幾個模擬online test，但次次都徘徊喺合格同唔合格既邊緣。我估計如果宜家走去考，我只係有一半機會合格。但以我既金魚記憶，如果再慢慢讀幾日先再考都係死梗，因為讀完個尾，頭果啲就已經唔記得。我決定硬著頭皮，用半個鐘衝咗一陣notes就login入去考試。
我等夜晚小朋友瞓哂我先開始login，費時做做下俾佢地interrupt。原本因為返工要早起既我已經好有睡意，不過當我一login個Citizenship Test portal，我個心開始跳得好似跑緊步咁快，令原本既睡意一掃而空。
我成功login入到個test，右手邊既45分鐘倒數計時同時啟動。第一條問題相當容易，我唔駛5秒已經答完去第二條。正諗住自己狀態大勇，點知去到第二條我就已經膠著。之後條條MC果4個答案都好似幻化成4位佳麗，而我就好似皇帝喺度揀妃子咁：個個都好啱喎，點揀先好呀…….？
我諗我同皇帝既分別，係佢可以揀all of the above，但我唔得。
喺考試既過程中，考生要全程開住個camera，以防你出貓。我諗我既面口應該係越來越難睇。我好好奇其實IRCC係咪真係有請人去睇返我地既考試片段，睇下我地有無出貓？如果有一份工請我每日8個鐘睇住人地愁眉苦臉個樣，我諗我返完工應該要睇心理醫生。
考試系統仲有一個叫做mark for review既功能，如果你想之後翻check呢條題目，只要喺條題目度check咗mark for review，問題編號就會轉成黃色，方便你之後搵返入去review。我用咗10分鐘就答哂所有題目，但有7條mark咗要review。如果我呢7條全部答錯，咁我就唔合格了。
我呢一刻既心情同所有無讀書既小朋友一樣：唔係怪自己點解無溫書，而係不斷地詛咒份卷：做乜你唔出我溫咗果啲啫？
不過作為一個喺香港長大既考試戰士，我深明考MC既精神係你唔駛知道個答案，你只需要知道有邊個唔似答案。我於是翻睇咗二十條題目兩次，慢慢用消去法將啲應該無乜可能既答案拎走。
用咗五分鐘，我將全部答案整理完畢。我只要一submit就可以即刻知道係生係死。
我好猶豫，係咪應該再check多一次卷呢？仲有大把時間，但我覺得就算俾多一個鐘我我都唔會比到第二個答案。我又同時喺度諗：就當我唔識果7條都係亂撞，我都有1/4機會中呀。如果我另外果個13條都啱，應該有啲機會勉強碌過吧？
放是我吸一啖氣，按下submit掣。
Loading個轉轉咗幾下，進入結果畫面。
19/20。
我剎那間感受到同當日考到車牌一樣既興奮同解脫，好想大叫出黎。因為自從大學畢業之後，我好耐都無感受過呢種「我呢世都唔駛再溫習呢樣野」既快感。不過因為已經係晚上十點幾，我忍住咗。
我唯有喺內心吶喊：我pass埋個加拿大入籍試喇！
跟住就係等IRCC confirm我呢個考試結果，等通知去參加Citizenship ceremony就可以成功入籍然後申請passport了。
唔知點解，我個腦開始不斷幻想自己去Citizenship ceremony唱國歌既時候，自己爆喊既畫面。唔知宜家係咪仲係online ceremony，定還是可以親身去攞張Citizenship cert呢？