阿囡升咗中之後，越來越唔明白佢講緊啲乜野。
本來唔好講話喺外國，我估就算我仲喺香港，可能都未必聽得明宜家啲teenager講乜。何況宜家除咗代溝、語言文化溝，仲多咗一條「internet溝」。
對於我呢個仲只係識用facebook既人，年青一代喺其他social media，例如TikTok，講既已經係另一套語言。以呢個年紀既小朋友計算，我估阿囡算係少睇social media：無睇TikTok、無join Discord、無去Reddit。但就算佢唔自己上網睇，同學喺學校都會講，佢自然會接觸到好多我唔識既網路潮語。
阿囡初初黎到返咗學之後，好鐘意講「emotional damage」。呢個字我覺得起碼就字面解都明白佢咩意思。但宜家升咗中，佢講既字開始唔係咁直接，例如佢其中講得最多既「what the Sigma (音讀”色麻”) 」，就令我丈二金剛摸不著頭腦。
起初一聽見阿囡不停重複講呢啲slang，我會叫佢唔好成日講。但我諗越叫小朋友唔好做，佢就越係想做吧。諗返自己細個，我都有一段時間好鐘意講「大檸樂」（即係大L鑊既諧音），因為好享受果種好似講咗粗口但實質又無講既快感。
我覺得小朋友講呢啲slang，除咗貪口爽，仲有一種同輩間既身份認同。個個friend都講，我唔講點埋堆呀。反正叫佢唔好講係無乜用，我決定反過來認真了解下啲slang點解。
好了，咁咩係「What the Sigma?」
根據我上網翻查，本來喺動物同人類研究既範疇入面，有一個叫做「Alpha male」既concept。Alpha，即係希臘字母既A，所以Alpha male你可以想像為「A級男性」 – 顧名思義即係指成功、有領導地位既男性。
Sigma同Alpha一樣，都係希臘字母。有人就以Alpha male呢個concept發明咗「Sigma male」出黎。Sigma male同Alpha male一樣都係成功人士既典範，不過佢地唔太在乎自己既地位、唔在乎世俗目光或規則，我行我素同低調。
去到後來，Sigma呢個字就簡化咗，泛指一個人就算唔刻意經營都好cool、好型咁解。後來總之任何野好似好勁咁，啲人就會話係Sigma：嘩，你幾件衫好Sigma。
至於「What the Sigma」，其實某程度上又唔係直接解「嘩點解咁勁」。呢句野出現喺一個網路上既短片，當中有兩隻公仔(Sponge Bob) 喺度互相講「What the sigma」，之後不知何故就喺網上紅咗，跟住啲middle schooler就開始學佢地講。
好似好無厘頭？係。從來呢啲網絡口頭禪係唔駛理由就可以紅。
宜家當啲小朋友講「What the sigma」，基本上係一句無乜特別意義既說話。以阿囡用既context，大概即係「攪乜野呀」、「唔係啩」咁既意思吧。
我research完之後，同阿囡解釋「Sigma」同 「What the sigma」既來由。果然，阿囡係唔知呢句野原來係咁解。所以當佢聽我解釋完，佢一臉意外，然後又徐徐地講出呢一句：
「What the Sigma……」