黎日本只有五日 。
一日三餐，即係得十五餐。
我覺得自己陷入咗同食buffet差唔多既選擇困難：喺有限時間同食量既情形下，你會選擇食咩好？你會每樣野都食啲？定淨係不停咁食你最鐘意果樣野？
今次日本之行，我諗我地係揀咗前者。
我本身最恨係食魚生，不過因為小朋友唔係太食生野，所以我地只係食咗一次迴轉壽司。
小朋友驚覺原來喺日本係無加拿大食開果啲roll，更發現……原來壽司係無加芒果既。相信今次都算係一種味覺上既震撼教育。
當我地每個人都為每一碟美味既壽司而興奮，弟弟反而全程望住我地食完果堆碟。相對於啲食物，原來佢比較關心啲碟可以叠到幾高。
最後大人細路對住果40隻叠起既碟，大家都滿意地點了頭。
要數小朋友喺日本最鐘意食既，應該係拉麵。
我地總共食咗三次拉麵，一次喺一蘭，一係喺街食咗一間中華拉麵，最後喺台場拉麵競技館又食咗一次。
我個人鐘意一蘭，一來個麵幾好食，二來淨係食個過程都幾過癮（喺香港果時無食過）。
弟弟最鐘意係中華拉麵，不過唔知係咪因為佢果日好肚餓。畢竟肚餓果餐，通常都係最好食果餐。
家姐就最鐘意拉麵競技館，因為佢鐘意有得揀。我地話食北海道，佢就話想試九洲，結果大家分開食，各自滿足。
日本既選擇就是多。
講到令我驚喜既一餐，係老婆既日本朋友帶我地去食既鰻魚飯。
我本身唔係特別鐘意食鰻魚，但一見到鋪滿成個盒面既鰻魚同聞到果陣燒鰻魚汁既香氣已經垂涎三尺。
起初以為盒鰻魚飯得果一盒野又無其他餸，實唔夠飽要食宵夜（藉口）。點知食食下，發現啲飯入邊有一個「夾層」 – 原來飯中間又再鋪咗另一層鰻魚。
即係類似人地雙層牛肉漢堡，佢就雙層鰻魚夾住啲飯。結果我就係俾呢層隱藏鰻魚KO咗，食完之後乜都食唔落。
除咗甜品……
好快五日既日本之旅就結束。弟弟話覺得今次未食夠未玩夠，下次不如黎日本玩兩個星期。
我同意，去日本玩點會夠喉㗎。但世界上除咗夠喉，都仲要講夠錢同夠假嘛……
不過我的確好期待有機會再同佢地返黎「拆」餐勁，再聽多幾次正宗既「二蛙沙醫媽蛇」。
I will be back!