弟弟同好多男仔一樣，鐘意鐵路。不過佢唔係鐘意架火車，而係鐘意鐵路呢類有一個「system」既野。所以佢鐘意Solar system (太陽系），甚至鐘意比較冷門、我都唔明點解會鐘意既periodic table (化學週期表）。
喺日本果陣已經發覺弟弟好鐘意東京各類鐵路系統。佢會走埋去睇個鐵路路線圖記哂啲站，然後每次我地同佢講去邊，佢就好似電腦咁話返條路線俾我地知。
我見弟弟咁鐘意，走埋站務員度問佢攞咗張東京既鐵路地圖俾弟弟。弟弟如獲至寶，每日返到酒店仲會mark低我地經過過邊啲站。
喺Calgary雖然都有鐵路系統（叫做C-train），不過好簡單得兩條線；再者因為呢度興揸車，所以弟弟好少會搭到。
於是返到黎香港，地鐵成為咗弟弟既景點之一。
我忽發奇想，同弟弟去各站「打卡」- 每搭一個站，我地就去個站名隔離影一張相留念。我地
試過搭到去將軍澳唔落車，同佢去影埋後面果啲站先返酒店；又試過特登搭到去柴灣站，只為影埋柴灣線尾果幾個站。
我諗俾著以前仲住喺香港果陣，我會覺得咁做好傻，肯定唔肯同佢一齊癲。
但我地宜家係遊客嘛。
我發覺呢個其實係一個唔錯既親子學習活動：弟弟會問下我每個站既名點解，返到酒店仲叫我搵Youtube睇下成個地鐵既發展史係點（即係啲站同線係幾時開始有）。一次過認識香港既歷史地理再加埋學中文，何樂而不為？
最終我同弟弟影咗50個車站，差不多影咗全部地鐵站既一半（香港應該有99個站），當中包括完成咗成條觀塘線同將軍澳線。
弟弟：「好野！我搭滿咗成條將軍澳線了！」
睇到弟弟好純真既笑，我深信佢應該會記住呢個經歷。
弟弟話希望下次再返香港既時候，可以影埋剩返果啲車站。唔知到時….又會多咗幾多個地鐵站呢？
大家又有無鐵路迷既小朋友？
