優才第三次面試

起初去完優才第二次面試以為已經攪完晒等結果，點知原來仲有第三次面試（可參考成個優才收生程序）：

優才第三次面試係旺角校舍進行，成個過程基本上唔駛30分鐘攪掂。面見通知書係叫左家長同埋小朋友一齊，不過果日媽媽唔得閒所以得我同阿囡去。

課室面見

簡單問答題

上到課室同阿囡一齊坐底，一位老師負責interview。問題包括：

1. 你叫咩名？
2. 邊個同你黎？
3. 你讀邊間幼稚園？
4. 平時邊個湊你同你做功課？
5. 星期六日爸爸媽媽會帶你去邊度玩？
6. 你最鐘意爸爸媽媽同你去玩咩？點解？
7. 你想唔想黎呢度讀書？<– 呢條其實出左事，阿囡好爽快咁答: 唔想!

中間因為阿囡講到睇書，於是老師就開始問我問題：

1. 平時睇書既習慣係點？
2. 阿囡睇d咩書？自己睇定係會陪讀？
3. 你鐘意爸爸定媽媽講故事比你聽？點解？<– 唔知點解阿囡好比面咁話鐘意我多d

合作講故事題

老師比左一本Oxford English Tree level 3既書 (我講果個故仔係呢個）比我同阿囡，個故事大約15頁紙，尾既10頁既字用紙遮住。首先由我開頭講頭幾頁（我係用廣東話），跟住就由阿囡接住看圖講晒成個故仔。

阿囡答得中規中矩，叫做講到個故事不過d 重點都skip左…基本上都唔係考你識字或者英文，反而係考下你表達能力。

以上成個問答我估大約15分鐘左右就完左。 跟住我地就落操場參加埋最後一part。

操場遊戲

最後一part落操場係跟住一個個小朋友完成一系列既運動：

1. “捐”過d障礙物
2. 跨d好矮既欄
3. 坐係一塊有4個輪既板，跟住用2支棍向前移動
4. 踢個波入龍門

每一part都有一個老師係度睇住，不過唔係好留意到佢點計分。雖則又唔算好大運動，不過都建議最好著波鞋方便行動。

做完去終點拎個禮物 (kinda出奇蛋) 就可以走得。

後記

自覺in得都幾好，雖則阿囡同人講話唔想入去讀…….。結果真係成功！